Read Zokam Phatna-late 55 Bible Online

Phatna-late 55 - Zokam bible

Phatna-late 55

¹Tumtheih makaipa ading. Khausai tumtheih-a sak. David phuah d[98] khat. Pasian aw, ka thungetna ngai in; kong thumna hong thusim lo kei in;

²hong za inla hong dawng in. Ka ngaihsutnate in hong lungkhamsak lua-a,

³galte aw le migilote hong salh gegana hangin ka lunghimawh lua hi; amaute in kei tungah thuakna hong tungsak uh a, hehsa in hong phuisam uh hi.

⁴Ka sungah ka lungsim tawl a, sihna launa in kei hong busim hi.

⁵Launa le linna in kei hong umcih a; lauluatna in kei hong tuamcip hi.

⁶Keimah in, "Vakhu bangin kha nei leng maw! Lengmangin ka khawl hithiat ding hi -

⁷gamlapi ah lengin sehnel gamah ka om ding hi;

⁸pingpei le huihpi tawh kigamlatna, ka kiliah nading mun manlangin ka zuan ding hi," ka ci hi.

⁹Topa aw, khuapi sungah ngongtatna le buaina mu ka hi manin; migilote tokbuai inla a kampau uh kilamdangsak in.

¹⁰Sun le zanin kulhte tungah vak kawikawi uh a; tua khua sungah kihuatna le kinawngkaisakna a om hi.

¹¹Khuapi sungah A susia theite gamtang uh a, kongzingte ah kivauna le kikhemna tawh a kilawi ngei kei hi.

¹²Galte khat in kei hong engko hileh ka thuakzo dinga; kei langah hong ensan khat ama thu-in ding hileh ka buksan thei ding hi.

¹³Ahi hangin nang bel keimah bang mi khat, ka kithuahpih ka lawm hoih mahmah

¹⁴khatvei lai-a kikholhna nuam ka sakpih, Pasian inn ah mihonte tawh ka tonpih na hi hi.

¹⁵Ka galte lakah siatna in omna ngah ahi manin theihkholh lohin sihna a[99] in amaute la henla, a hingtangun hankhuk ah paisuksak hen.

¹⁶Ken ahileh Pasian ka sam a, TOPA in kei hong honkhia hi.

¹⁷Nitak, zingsang le sunin lungdongin ka kikoko a, amah in ka aw hong za hi.

¹⁸Mi tampi in kei hong langneih zongin, ka langa galte hong dodenna pan a liam loin kei hong tankhia hi.

¹⁹Kumpi tokhoma a om denpa Pasian in amaute za-in thuaksak ding hi - amaute a lampi uh a khel ngei lo, Pasian zong a kihta lo mite ahi uh hi.

²⁰Ka kithuahpih mi in a lawmte sim-a; ama thukhun a palsat hi.

²¹Ama kam thawhbat bangin nal napi a lungsim ah kigalneihna a om hi; a thugente sathau sangin nalzaw napi namsau dawhsa ahi hi.

²²TOPA tungah na lungsim vangik teng suan in, aman hong puakpih ding hi; amah in thumaante puksak ngei lo ding hi.

²³Ahi hangin Pasian aw, nang in kisiatna gum sungah migilote na khia dinga; sisan suahte le zuauphuak mite a nuntak hun uh alang na khiam ding hi. Ahi hangin ke’n ka hileh nangmah kong muang hi.