Read Zokam Phatna-late 59 Bible Online

Phatna-late 59 - Zokam bible

Phatna-late 59

¹Tumtheih makaipa ading. "Susia kei in" cih aw a sak ding. David phuah. f[107] khat. Saul in David a thah theih nadingin a inn vil dinga mi a sawl hun a. Pasian aw, ka galte panin hong hukhia in; ka langa dingte panin hong dal in.

²A sia-a gamtate panin hong hu inla, sisan suah hat mite pan hong honkhia in.

³Amaute in kei hong pansim lam uh mu in! TOPA aw kei mawh, kei khialhna om lopi-in mi ngongtatte in hong sawmsim uh hi.

⁴Khialhna ka bawl loh hangin kei sim dingin a baihsa-in om uh hi. Hong huh dingin tho in; ka tuah siat hunin hong en in.

⁵Israel’ Pasian, a Thahatpen Pasian, TOPA aw, minam khempeuh dan thuaksak dingin nangmah hong tho inla; a lehhek migilote lainat kei in.

⁶Amaute nitak ciang ciahin uite bangin ngik uh a, khuapi kimkot ah a vak khuankhuan uh hi.

⁷A kam panun a phitkhiat uh en in - a muk panun namsaute phitkhia uh a, "Kuan hong za ding hiam?" ci uh hi.

⁸Ahi hangin TOPA aw, nang amaute nuihsan inla tua minamte khempeuh zahpih in.

⁹Ka Thahatna aw, nangmah kong mitsuan hi; Pasian aw, nang ka kulhpi,

¹⁰ka it Pasian na hi hi. Ka mai-ah Pasian pai dinga kei hong gensiate tungah hong kisialsak ding hi.

¹¹Kote’ lum a[108] Topa aw, amaute that kei in, na thah leh ka mite in a mangngilh ding uh hi. Nangma hatna-in kawivakvaksak inla amaute niamkhiat in.

¹²A kamte uh mawhnate, a muk ua a paute uh hangin- amaute kisaktheihna ah amaute mah lehmatsak in. Amaute in hamsiat in zuauthu a genna uh hangin

¹³thangpai-in hultum henla a om nawnloh dongun amaute hultum hen. Tua ciangin Pasian in Jacob uk hi cih leimongte dongin a kithei ding hi.

¹⁴Amaute nitak ciangin ciah uh a, uite bangin ngikin khuapi kimkot-ah a vak khuankhuan uh hi.

¹⁵An zongin sukvak tovakin, a kham zawh kei uh leh ham ngaungau uh hi.

¹⁶Ahi hangin nang ka kulhpi le lungkham hunin ka belh na hi manin na hatna la-in ka sa dinga, zingsangin na itna la in ka sa ding hi.

¹⁷Keima Thahatna aw, nang phatna kong sak hi; Pasian aw, nang ka kulhpi le ka it Pasian na hi hi.