Read Zokam Phatna-late 62 Bible Online

Phatna-late 62 - Zokam bible

Phatna-late 62

¹Tumtheih makaipa ading. Jeduthun ading David phatna-la khat. Ka hinna in Pasian tung bek ah khawlna mu a; keima hotkhiatna ama tung pan ahi hi.

²Keima suangpi le ka kihotkhiatna amah bek hi a; keima kulhpi amah ahi hi, hong kiling zo kei ding hi.

³Mi khat bang tanvei sim lai ding na hi hiam? Hih kulh awnsa le dai kipuk dek - note khempeuh in sawnpuk ding na hi uh hiam?

⁴Amaute in amau munsang panin kiatsak ding bek sawm uh a; zuauphuah nuam a sa uh hi. A kamun thupha pia napi a lungsimun a hamsiat uh hi.

⁵Ka hinna aw, Pasian bek ah khawlna mu in; keima lametna amah pan ahi hi.

⁶Keima suangpi le ka kihotkhiatna amah bek hi a; keima kulhpi amah ahi hi; hong kiling zo kei ding hi.

⁷Ka hotkhiatna le ka pahtawina Pasiana a[112] ah om a; amah ka thahatna suangpi le ka belhna ahi hi.

⁸Mite aw, hunte khempeuh ah amah muang un; Eite belhna Pasian ahi manin na lungsimte uh ama tungah sung un.

⁹A dinmun niam mite husan khat bek hi a, dinmun sangte lah zuaupi hi lel hi; tehna-in kiteh leh amaute bangmah hi lo uh a; amaute husan khat bek hikhawm uh hi.

¹⁰Zawhthawh thu-a suh muang kei unla, guksa van ah zong kisathei kei un; na hauhna uh a khang zongin tuate lungmuanpih kei un.

¹¹Pasian in na khat gen a, na nih ka za hi: Pasian aw, tua in nang hatna hi-a,

¹²Topa aw, tua in nang itna ahi hi. Mi peuhmah ama sepsa tawh kizui- in pahtakman na pia taktak ding hi.