Read Zokam Phatna-late 63 Bible Online

Phatna-late 63 - Zokam bible

Phatna-late 63

¹David phuah phatna-la khat. Judah Sehnel gama amah a om lai huna. Pasian aw, keima Pasian nang na hi a, ka lungsim neihzah in nang kong zong hi; gam keu le gimna gam tui omlohna munah ka hinna dangtak a, nang hong duh in, ka pumpi in nang hong ngai hi.

²Mun siangtho sungah nang kong mu khina, na vangliatna le na minthanna ka en hi.

³Nuntakna sangin nangma itna hoihzaw ahi manin, ka mukte in nangmah hong minthangsak ding uh hi.

⁴Ka nuntak laiteng nang kong phat dinga, nangma minin ka khutte ka laamto ding hi.

⁵An limpente nek bangin ka hinna a tai ding hi; ka kam in kipahna muk tawh nang hong phat ding hi.

⁶Ka lupna tungah nang kong phawk a; zan vil sung tawntung nang kong ngaihsunsun hi.

⁷Kei hong huh nang na hi manin na khate’ liim nuai ah la ka sa hi.

⁸Ka hinna in nang hong bel a; na taklam khut in kei hong lenkip hi.

⁹Ka nuntakna hong zong amaute kisia ding uh a; leithuk sungah paisuk ding uh hi.

¹⁰Amaute namsau vat dingin kipia dinga, se-alte an a suak ding uh hi.

¹¹Ahi hangin Pasian sungah kumpipa nuam dinga; Pasian min-a kiciamte khempeuh in amah phatin, zuauphuakte kam ahileh a kisipsak ding hi.