Read Zokam Phatna-late 64 Bible Online

Phatna-late 64 - Zokam bible

Phatna-late 64

¹Tumtheih makaipa ading. David phuah phatna-la khat. Pasian aw, ka phunna kong genkhiat mah bangin hong za in; gal launa panin ka nuntakna hong dal in.

²Migilote sawmsimna pan, gamtatsia mihon buaina panin kei hong sel in.

³Namsau bangin a leii uh hiamsakin sihtheihna thaltangte bangin a kammal un a ngim hi.

⁴Amaute in munbu panin mawhpeng mi kap uh a; lau het loin thakhatthu-in amah kap uh hi.

⁵Amaute khat le khat gitloh sawm ding kihanthawn uh a, a sima thangsiah ding a kikum uh hi. Amaute in, "Kua in tuate a[113] mu ding hiam?" ci uh hi.

⁶Amaute in thutang lo ding sawmin, "Gelna kiciantak khat ngaihsunkha hang ei!" kici uh hi. Mihing lungsim le ngaihsutna a zuauphuakpi ahi hi.

⁷Ahi hangin Pasian in amaute thaltangin kap dinga; thakhatin a kisatpuk ding hi.

⁸Amah in amau leiite amau tung mah tusak dinga, susia-in, amau a mute khempeuh in zahpihin a lu uh peisan ding uh hi.

⁹Mihing khempeuh lau ding uh a, amaute in Pasian nasepte tangko in a sepsate a ngaihsunsun ding uh hi.

¹⁰A thumaante in TOPA sungah lungnuamin amah bel uh henla; a lungsima a thutang khempeuh in amah phat uh hen!