Read Zokam Phatna-late 66 Bible Online

Phatna-late 66 - Zokam bible

Phatna-late 66

¹Tumtheih makaipa ading. La khat. Phatna-la khat. Pasian tungah leitung khempeuh nuamin kiko un!

²Ama minthanna la-in sa un; Amah phatna thangsak un!

³Pasian tungah, "Na bawlsate lipkhaphuai na lawmlawm e! Na vangliatna lian lua-a na mai ah na galte toncip uh hi.

⁴Leitung khempeuh nang tungah hong khukdin uh a; nang phatna la sa-in na min phatna la a sa uh hi," ci un.

⁵Hong pai unla Pasian nasepsate hong en un; mite tanga a sepnate nak lipkhap huai si!

⁶Amah in tuipi leikeu suaksak a, amaute in a khe un gunte ngaptan uh hi - hong pai un amah ah kipak ni.

⁷Amah in a vangliatna tawh uk tawntung a, a mit in minamte a vil gige hi - amah langdo dingin kuamah ding kei hen.

⁸Mite aw, eite Pasian phat un, amah phatna ging kizasak un;

⁹amah in eite nuntakna hong hawisak a, i khete a talsak kei hi.

¹⁰Pasian aw, nang kote nong zia-et a; ngun bangin nong halsiang hi.

¹¹Kote thong sung nong tun a kote nungzang ah vangik nong suan hi.

¹²Kote’ lutungah mite na tuangsak a; mei lak tui lak ka nawk uh hangin kicinna munah kote nong tun hi.

¹³Meihal biakna kengin na biakinnpi ah kong pai dinga nang tunga ka kiciamnate ka tangtun ding hi -

¹⁴tuate pen ka lungkham ciangin ka muka ka kiciamna le ka kama ka paute ahi hi.

¹⁵Ganhing thaute-in nang biakna kong pia dinga, tuutalte in biakna kong pia ding hi; bawngtalte le keelte in nang kong bia ding hi.

¹⁶No Pasian a kihtate khempeuh, hong pai unla ngai un; kei adingin ama sepsate hong gensak un.

¹⁷Ama tungah ka kamin ka kikokhia a; ka leii tungah amah phatna om hi.

¹⁸Ka lungsimin mawhna pakta hileng Topa in ka thu hong ngai lo khin ding hi;

¹⁹ahi hangin Pasian in ka thugen ngai-in ka thungetna aw za khin taktak hi.

²⁰Ka thungetna hong nial lopa kei tung pan a itna zong a dokkik lopa Pasian kiphat ta hen!