Read Zokam Phatna-late 69 Bible Online

Phatna-late 69 - Zokam bible

Phatna-late 69

¹Tumtheih makaipa ading. Unokte’ aw a sak. David phuah Pasian aw, tuite in ka ngawng ciang tuum ahi manin kei hong honkhia in.

²Siksan ding omlohna, buannawng thukpi ah ka tum hi; tui thukpite sung ka tunga; a tuikhang in hong valhtum ta hi.

³Huh ding ka ngetngetna-in ka tawlgawp a, ka gawl a keu hi. Ka Pasian ka zonzonna-in ka mit a maang hi.

⁴A thu om lo a kei hong mudah mi, ka lu-a ka samzangte sangin tamzaw a; a thu om lopi-a kei siatsak hong sawm ka galte a tam hi. Ka guk lohpi a dinkik dingin hong kisawl tentan hi.

⁵Pasian aw, ka hai lam na thei hi; ka khialhnate nang panin kisel lo hi.

⁶Topa, Thahatpen TOPA aw, nang hong lamente kei hangin maimawl kei uh hen; Israel’ Pasian aw, nang hong zongte kei hangin maizum kei uh hen.

⁷Ahang in nangma hangin simmawhna ka thuak a, maizumna in ka mai tuam hi.

⁸Ka sanggampa adingin mikhual ka suak a, keima’ nu’ tapate adingin pemta ka suak hi;

⁹na inn ading ka aamna in kei hong netum a, nang hong engkote’ engkona kei tung hong tu hi.

¹⁰Kap a an ka tan ciangin zahkona ka thuak ding mah hi-a,

¹¹puanhampi ka silh ciangin mite khel gentehna ka suak hi.

¹²Kongpi-a tute in hong zahko uh a, zukhamte’ la ka suak hi.

¹³Ahi hangin TOPA aw, na angvan hunin thu kong ngen hi; Pasian aw, nangma itna lianpi tawh, na hotkhiatna takpi-in kei hong dawng in.

¹⁴Buannawi lak panin kei hong hu-inla, hong tumsak kei in; hong mudahte pan le tuithukte panin kei hong hukhia in.

¹⁵Tuikhangte kei hong tuumsak loin tui thukte kei hong valhsak kei inla, gum in a kam hong cihkhum kei hen.

¹⁶TOPA aw, na itna a hoihna hangin hong dawng in; na lainatna lianpi hangin kei lam hong nga in.

¹⁷Na nasempa na mai hong selsan loin hong dawng meng in ka lungkham ta hi.

¹⁸Hong naih inla kei hong hu in; ka galte hangin kei hong tankhia in.

¹⁹Kei hong kizahpih a, maimawlin ka maizum zia nong thei hi; ka galte khempeuh na mai-ah om uh hi.

²⁰Zahpihna in ka lungtang kitamsaka huh ding nei loin hong nusia hi. Hong khasiat ding mi ka zonga khatbeek om lo hi; hong hehnem ding ka zonga khatbeek ka mu kei hi.

²¹Ka an lakah sinkha hel uh a, ka dangtak a phat nadingin lenggahzu thuk hong pia uh hi.

²²Amaute mai-a kilui sabuai thangzak suak henla, thukna le a[125] pial suak ta hen.

²³Khua a muh theihloh nadingun a mitte uh mial henla, a nung uh kul den ta hen.

²⁴Amaute tungah na thangpaihna sung inla, na hehluatna in amaute phadong hen.

²⁵Amaute mun kilawi henla; amau puanbukte ah a teng ding kuamah om kei hen.

²⁶Ahang in, amaute in na liamsakte bawlsia uh a, na natsak mite natna a gengen uh hi.

²⁷Amau mawh khukna tungah mawhkhusak beh inla, na hotkhiatna tangsak kei in.

²⁸Nuntakna laibu sung panin amaute kiphiatkhia henla a thumaante tawh kiciamteh khawm kei hen.

²⁹Na sa-in ka lung dong hi; Pasian aw, na hotkhiatna in kei hong dal hen.

³⁰Pasian’ min la-in ka phat dinga, lungdamkohna tawh amah ka minthangsak ding hi.

³¹Hih in bawngtal khat sang, kite le khecinte a nei bawngtal khat sangin TOPA a lungkimsakzaw ding hi.

³²A zawngte in mu ding uh a, kipak ding uh hi - no Pasian a zongte aw, na lungsimte uh thadim hen!

³³TOPA in a tasamte aw za a; ama koltangte a simmawh kei hi.

³⁴Leitung le vantung, tuipite le a sunga gamtang khempeuh in amah phat uh hen;

³⁵ahang in, Pasian in Zion honkhia dinga, Judah khuapite a lam kik ding hi. Tua ciangin tua lai-ah mite tengin a nei ding uh hi;

³⁶a nasemte’ tate in tua mun luah ding uh a, ama min a itte tua lai ah teng ding uh hi.