Read Zokam Phatna-late 71 Bible Online

Phatna-late 71 - Zokam bible

Phatna-late 71

¹TOPA aw, nang kong bel hi, hong maizumsak ngei kei in.

²Nangma thumaanna-in hong hu inla, hong suaktasak in; na bil kei hong ngat inla hong honkhia in.

³A tawntunga pai-a ka belh suangpi hong hi in; ka suangpi le ka kulhpi na hi manin kei hotkhiat nading thu pia in.

⁴Ka Pasian aw, migilote khut pan le gilo-a a kheltatte hong matna panin hong hukhia in.

⁵Ahang in Thuneipipen TOPA aw, ka khangno lai-a kipan ka kimuanna ka lametna nang na hi hi.

⁶Ka suah a kipanin nang tungah kong kinga a; ka nu sul panin nong lakhia hi. Nangmah kong phat den ding hi.

⁷Mi tampi adingin a siahil ka suak a, ahi hangin nang ka belh muanhuai na hi hi.

⁸Ka kam ah nang phatna dim a, sun nilohin na thupina ka langsak hi.

⁹Ka tek ciangin hong nawlkhin kei inla; ka thakiat ciangin hong taisan kei in.

¹⁰Ahang in, ka galte in hong langgen uh a; kei thah hong sawmte a kikumkhawm uh hi.

¹¹Amaute in, "Pasian in amah taisan khin hi; a hu ding kuamah om lo ahimanin delh unla man un," kici uh hi.

¹²Pasian aw, hong gamla omsan kei in; Ka Pasian aw, hong huh dingin hong paimeng in.

¹³Kei hong mawhmatte maizumin kisia uh henla, kei hong nasak nuamte zahlakna le mindaina in khuh ta hen.

¹⁴Ahi zongin keimah in ka hileh lametna ka nei tawntung dinga; nang kong phatzaw semsem ding hi.

¹⁵A phatan ka thei kei zongin sun nilohin na thumaanna le na hotkhiatna ka kam in gengen ding hi.

¹⁶Thuneipipen TOPA aw, keimah hong pai-in thahatna tawh na sep a thupite ka tangko ding hi. Nangma thumaanna - nangmah kia aa ka tangko ding hi.

¹⁷Pasian aw; ka khangno lai-a kipan nong hilh a, na sepna a piandangte tuni dongin ka genkhia hi.

¹⁸Pasian aw, khang kikte tungah na vangliatna genkhia in khang kikte kiangah na vangliatna genkhia-in, a khanglai dingte khempeuh tungah na hatna ka pulak mateng tekin ka sam nangawn a kang zongin hong taisan kei in.

¹⁹Pasian aw, nangma thumaanna in huihkhuate ban-a, nalianpite a semkhinpa nangmah na hi hi. Pasian aw, nang tawh a kibang kua ahi hiam?

²⁰Lungkhamnate nong tuaksak a, a haksa tampi om napi ka nuntakna hong thaksuaksak a; leisung thukpi panin nong pito kik ding hi.

²¹Kei hong kipahtawina na khangsak dinga, khatvei nong hehnem kik ding hi.

²²Ka Pasian aw, nangma thumaanna hangin harp in nang kong phat ding hi; Israel Siangtho Pa aw, nangmah phatna lyre in ka sa ding hi.

²³Nong tatsa keimah in nangmah phatna ka sak ciangin ka mukte nuamin kiko ding hi.

²⁴Kei hong nasak nuamte maizumin buaigawp ta ahi manin, thumaana na nasepnate ka leii in sunniloh in a gengen ding hi.