Read Zokam Phatna-late 72 Bible Online

Phatna-late 72 - Zokam bible

Phatna-late 72

¹Solomon phuah Pasian aw, kumpipa tungah na thutang pia in, kumpipa’ tapa tungah na thumaanna pia in.

²Amah in na mite tungah thumaanin thu khen dinga a[126], a hingimte tungah thutangin thu a khen ding hi.

³Na mite tungah mualliante in daupaina tun ding uh a, mualneute in thumaanna gah a tun ding uh hi.

⁴Amah in mite lakah a hingimte gum in a tasamte’ tate hon dinga; mi nengniamte a suzan ding hi.

⁵Amah in ni a om laiteng, kha a om laiteng khang tawntungin hong thuak keikai b[127] ding hi.

⁶Amah lopa vatsa lo tunga guah zu leh lei buakkawt guah a bang ding hi.

⁷A thumaante ama nuntak sungteng thamalh dinga; khapi a om nawn loh dong a daupai ding hi.

⁸Amah in tuipi panin tuipi dong uk dinga, Gunpi c[128] panin leimongte d[129] dong a uk ding hi.

⁹Sehnel-gama behte a mai-ah kun ding uh a, a galte in leivui a liak ding uh hi.

¹⁰Tharshish kumpite le gamlapi-a tuipi gei-ate in amah siah puak ding uh a; Sheba le Seba kumpite in letsongte pia ding uh hi.

¹¹Kumpite khempeuh ama mai-ah kun ding uh a, minam khempeuh in a na sem ding uh hi.

¹²Ahang in tasama amah a kote hu dinga, a huh ding khat beek a nei lo a hingimte a hu ding hi.

¹³A zawngkhalte le a tasamte hehpih dinga, a tasamte sihna pan a hon ding hi.

¹⁴Ama muhna ah amaute sisan manpha sa ahi manin netniamna le ngongtatna panin amaute a hu ding hi.

¹⁵Amah khansawt hen! Sheba panin amah kham kipia hen. Mite in ama adingin thu ngen uh henla, sun nilohin thupha piapia uh hen.

¹⁶Gamsung khempeuh ah an tampi piang henla mualneute tungah kiling metmet hen. Lebanon bangin gahpha henla gam sunga lopa bangin khanpha uh hen.

¹⁷Ama min kip tawntung henla; ni a om laitengin kizomsuak ta hen. Ama tungtawnin minam khempeuh thupha kipia dinga, amaute in amah thupha ngah ci ding uh hi.

¹⁸Israel Pasian amah bek a piandang na a sempa, TOPA Pasian kiphat ta hen.

¹⁹A minthang ama min kiphat tawntung henla, leitung buppi ama minthanna dim hen. Amen, Amen.

²⁰Jesse’ tapa David thungetna a khupna ahi hi.