Read Zokam Phatna-late 73 Bible Online

Phatna-late 73 - Zokam bible

Phatna-late 73

¹Asaph phuah phatna-la khat. Lungsim siangtho Israel tungah Pasian hoih taktak hi.

²Ahi zongin kei bel ka khete tal dektak a, ka dinna ka khahsuah dekdek hi.

³Ahang in, migilote a daupai ka muh ciangin a ki-uangsakte ka eng kha hi.

⁴Amaute in hanciam luat nei lo uh a; a pumpi uh cidamin thahat uh hi e[130].

⁵Mikim puak vangikte pan suakta uh a mihing natnate-in gimna a thuak kei uh hi.

⁶Tua ahi ciangin kiphatsakna khi in nei uh a; ngongtatna puan in a silh uh hi.

⁷Amaute thukhuallohna lungsim panin mawhna lian a[131] piang a; amau ngaihsutna-khel in ciangtan a nei kei hi.

⁸Mi simmawhna kam pau uh a; kiphasakin mi a nengniam uh hi.

⁹Amaute in a kam un vantung nangawn amau aa suah uh a, amaute’ leii in leitung a nei hi.

¹⁰Tua ahi ciangin amau mite amau lamah nga uh a, tui tampipi b[132] a dawnkang uh hi.

¹¹Amaute in, "Pasian in bangci theih thei ahi hiam? Sang Pen pa in theihna nei ahi hiam?" ci uh hi.

¹²Migilote hih bang ahi uh hi - awlmawh nei lo uh a, a hauhna uh khang semsem hi.

¹³Ka lungsim a siangtho-a ka kepna; le ka khutte a mawhpeng a ka silna a mawkna taktak ahi hi.

¹⁴Sun nilohin hong kigimsak hi; zingsang simin dan hong kituaksak hi.

¹⁵Keimah, "Hih bangin ka pau ding hi," ci leng na tate a lehhek khin ka suak ding hi.

¹⁶Hih khempeuh theihtel ka sawm ciangin Pasian mun siangtho ka lut mateng

¹⁷kei adingin gimhuai lua hi; tua khit ciangin amaute bei nading ka theitel hi.

¹⁸Amaute a nalna munah na koih takpi a; kisiatna ah na paaisuk hi.

¹⁹Amaute kisia vat si uh e! Patauhna in phiatmang kiuhkeuh hi lo maw!

²⁰Mi khat khanglo a, mangmat bang hi, TOPA aw, na thawh ciangin sunmangte bangin amaute na thupisim kei ding hi.

²¹Ka lungsim gim a ka kha a dahluat ciangin,

²²ngaihsutna mel nei loin thudon ka nei kei hi; na mai-ah gamsa gilo ka hi lel hi.

²³Tua hi napi nangmah tawh ka omkhawm den hi; ka khut taklamin nong len hi.

²⁴Lam hong lakin nong makaih a, maihun ciangin minthanna ah kei nong la ding hi.

²⁵Vantungah nang lo a dang kua nei ka hi hiam? Leitung in nang longal ka deih ding bangmah a nei kei hi.

²⁶Ka ci-le-sa le ka lungsim zawm thei kha ding hi; ahi zongin Pasian pen ka lungsim hatna le keima tanh ahi tawntung hi.

²⁷Nang tawh a kigamlate kisia ding uh hi; nang tunga a muanhuai lote khempeuh na susia hi.

²⁸Ahi hangin kei adingin Pasian tawh kinai a hoih hi. Thuneipipen TOPA ka bukna-in ka bawl khin hi; na sepsate khempeuh ka gen ding hi.