Read Zokam Phatna-late 74 Bible Online

Phatna-late 74 - Zokam bible

Phatna-late 74

¹Asaph phuah c[133] khat. Pasian aw, bang hangin kote hong nolh den na hi hiam? Bang hangin na lonona muna na tuute na hehna am in bii ahi hiam?

²Tanglai-a na leisa mite, nangma goutanh dinga na tatsa behte - na tenna Zion Vum mangngilh kei in.

³Tawntung siatna lamah manawhin kal suan in, mun siangtho khempeuh gal in susia khin hi.

⁴Kote tawh na kituahna munah na galte hawk uh hi; amaute lim dingin dialkhaite a khai uh hi.

⁵Amaute singphatna muna hei tawi-a sing banphuk mite bangin gamta uh hi.

⁶Amaute in a kikhuak zepna khempeuh heipi le heita in tenzan uh hi.

⁷Amaute in na mun siangtho lei tawh cinin a haltum uh hi; nangma Min tenna mun buahsak uh hi.

⁸A lungsim un, "Tuate zanmangsak ni," ci uh hi. Amaute in gam sunga Pasian kibiakna mun peuhmah a haltum uh hi.

⁹Kote, lim lamdangte lah hong kipia loin kamsangte lah om nawn lo a, hih hun bangtan sawt ding cih a thei ka om kei uh hi.

¹⁰Pasian aw, galte in nang bangtan vei hong simmawh lai ding uh hiam? Galte in na min daisak den ding uh ahi hiam?

¹¹Bang hangin na khut dok kik na hi hiam, na taklam khut? Na puan kawm pan lakhia inla amaute susia ve!

¹²Ahi hangin Pasian aw, tanglai-a kipanin ka kumpipa na hi a; leitungah hotkhiatna nong puak hi.

¹³Na vangliatna tawh tuipi a khenkham nangmah na hi-a; tui sunga Leviathan lutangte na sukham hi.

¹⁴Tuisung ganhing Monster lutangte a suzan nangmah na hi-a, sehnel-gam a ganhingte an dingin na pia hi.

¹⁵Tuinakte le luite a phulkhiasakpa nangmah na hi-a; a luanglai gunte a kangsakpa na hi hi.

¹⁶Sun nang aa hi-a, zan zong nangma aa mah ahi hi; ni le kha nangma phuhsa ahi hi.

¹⁷Leitung gamgite khempeuh a khung nangmah na hi-a, phalbi hun le khuakhal hun nangma bawlsa tuak ahi hi.

¹⁸TOPA aw, galte in nang hong selphozia uh le mihaite in na min a daisakzia uh phawk gige in.

¹⁹Na vakhu’ nuntakna gamsa gilote tungah pia kei inla; a thuaksia na mite nuntakna mangngilh suak kei in.

²⁰Leitung a mialna munte mi ngongtatte zualna mun suak ta ahi manin na thukhun hong thusim in.

²¹A kinengniamte maimawlsak kei inla; mizawngte le a tasamte in na min phat uh hen.

²²Pasian aw, tho inla na thu gum in; mihaite in sun niloh a nang hong simmawhzia uh phawk in.

²³Nang hong langpangte awging le na galte husa thusim lo kei in.