Read Zokam Phatna-late 75 Bible Online

Phatna-late 75 - Zokam bible

Phatna-late 75

¹Tumtheih makaipa ading. "Susia kei in" aw a sak ding. Asaph phuah phatna-la khat. La khat. Pasian aw, nang tungah lungdam kong ko uh hi, na Min hong nai ahi manin lungdam kong ko uh hi; mite in na bawl nalamdangte gen uh hi.

²Nang, "A kiseh hun ka teel a; thutanga thukhenpa kei ka hi hi.

³Leitung le a mite a kilin ciangin a khuampite a lenkip keimah ka hi hi.

⁴A kihisakte tungah, ‘Kiphasak nawn kei un,’ ka ci a, a gilote tungah, ‘Na kite vik nawn kei in.

⁵Vantung langah na kite likto ke’n la; ngawng paksa in pau kei in,’ ka ci hi," na ci hi.

⁶Nisuahna ahi-a nitumna ahi-a, sehnel-gam pan ahi zongin mi a tawisang thei khat beek a om kei hi.

⁷Ahi hangin thu a khen Pasian hi a: Amah in khat niamkhiatin adang khat a tawisang hi.

⁸TOPA’ khut sungah hai khat om a, a namtuite tawh a kihel zu phuan seuhseuh a dim hi; amah’n sungkhia a, leitunga migilote in a bei siang dongin a dawnsuk uh hi.

⁹Ke’n ka hileh hih ka pulak tawntung ding hi; Jacob’ Pasian tungah phatna la ka sa ding hi.

¹⁰Migilote’ kite khempeuh ka attan dinga, a thumaante’ kite ahileh a kisangsak ding hi.