Read Zokam Phatna-late 77 Bible Online

Phatna-late 77 - Zokam bible

Phatna-late 77

¹Tumtheih makaipa ading. Jeduthun ading. Asaph phuah. Phatna-la khat. Pasian tungah huhna ngenin ka kikokhia hi; Pasian hong zak dingin ka kikokhia hi.

²Ka lungdon ciangin Pasian ka sam hi; zanin ka khut gimsak loin ka zakkhia a, ka hinna a kihehnem thei kei hi.

³Pasian aw, nang hong phawkin ka mau hi; ka lungsim ka geelgeel a ka kha a bah ta hi.

⁴Ka mit na mitsisak kei a, lungkham lua-in ka pau kei hi.

⁵A beisa nite le kum sawtpi laite ka ngaihsun hi;

⁶zana ka la sakte ka phawk hi. Ka lungsim in geelgeelin ka kha in dong a:

⁷"Topa in eite hong nial den tam maw? Ama angvanna hong lak kik nawn kei ve maw?

⁸Ama itna kip mangsuakta hi ve maw? Ama thuciam kipeel den ta ve maw?

⁹Pasian in a lainat ding mangngilh ahi tam? Amah hehin ama khuatuahna dok kik ta ahi tam?" ci hi.

¹⁰Tua ciangin hih thu: "Sang Penpa taklam khut seplai kumte, ngen lai ning," ci-in ka ngaihsun hi.

¹¹TOPA’ sepsate ka phawk ding hi; hihi, tanglai-a na bawl nalamdangte ka phawk ding hi.

¹²Na nasepte khempeuh ka lungngaingai dinga, a thahat na nasepte khempeuh ka ngaihsunsun ding hi.

¹³Pasian aw, na lampite a siangtho hi. Eite Pasian zah a lian bang pasian om ahi hiam?

¹⁴Nalamdangte a bawl Pasian nang na hi-a; mite lakah na vangliatna na lakkhia hi.

¹⁵Na khut thahatin nangma mi, Jacob le Joseph’ suante na tankhia hi.

¹⁶Pasian aw, tuite in nang hong mu uh a, tuite in nang hong mu-in a kivei uh hi; tui thuk mahmahte a kilok damdam uh hi.

¹⁷Meiite in tui buasuk a, vanging in huihkhuate a thawn hi; na thaltangte a suktaan a totaan hi.

¹⁸Pingpei lakah na vanging kiza a, na khuaphia in leitung buppi taanin, leitung lingin a kising hi.

¹⁹Na khelam tuipi tungah pai a, na lamlianpi tuihatte tungah pai napi, na khekhapte a kimu kei hi.

²⁰Nang mah in na mite tuuhon bangin Moses le Aaron’ khutin na makaih hi.