Read Zokam Phatna-late 78 Bible Online

Phatna-late 78 - Zokam bible

Phatna-late 78

¹Asaph phuah b[135] khat. Ka mite aw, kong hilhna za un; ka kama ka gen thute ngai un.

²Gentehnate zangin ka kamka dinga, tanglai nate, a kisel nate ka pholak ding hi -

³tuate in i theihsa le i zaksa nate, i pate in hong gensa nate ahi hi.

⁴Amau tate tungah tua thute i im kei ding hi; ei khita khangte tungah a phattak TOPA septe, ama vangliatna le ama bawl a lamdangte i gen ding hi.

⁵Amah in Jacob adingin thukipte pia a, Israel sungah thukham kipsakin i pate tungah a tate uh a hilh dingun thu a pia hi;

⁶tua in amau khita khangte le a suak nai lo naupangte nangawn in thei a, amau zong a tate uh tungah a gensawn theih nading uh ahi hi.

⁷Tua hileh amaute in a muanna uh Pasian ah nga ding uh a, a nasepsate mangngilh loin ama thupiakte zui ding uh hi.

⁸Amaute, a lungkhauh a lehdo thei khang mite, Pasian tungah a lungtangte uh a citak lo - ama tungah a lungsim uh a muanhuai lo, a pate uh tawh a kibang kei ding uh hi.

⁹Epharaim mite in thal a tawi uh hangin galdo ni-in a lehtai uh hi;

¹⁰amaute in Pasian thukhun zui loin, a thukham banga nuntak ding a nial uh hi.

¹¹Amaute in ama bawlsate le amaute a lahsa nalamdangte mangngilh uh hi.

¹²Amah in Egypt gama Zoan kual ah a pate uh muhin nalamdangte bawl hi.

¹³Tuipi kikhensak a, a maute a kantansak hi; amah in kawm bangin tui a dingkipsak hi.

¹⁴Amah in sunin amaute meii-in makaih a, zan nilohin meitangin a makaih hi.

¹⁵Sehnel-gam ah suangpite sukham in, tuipite zah a tam tui, amaute pia hi;

¹⁶suangpi heng pan luite suakkhiasak a, gunte bangin tui a luangkhiasak hi.

¹⁷Ahi hangin ama tungah amaute mawh lai veve uh a, sehnel-gam ah Sang Penpa a langdo veve uh hi.

¹⁸Amau lunggulh an a ngetna uh thei gige in Pasian a zia-et uh hi.

¹⁹Amaute Pasian langah pau in, "Pasian in sehnel-gam ah sabuai phah thei ahi hiam?

²⁰Suangpi a sat ciangin tui phulkhia a luituite tampitak a luang hi. Ahi hangin amah’n an zong hong pia thei ngap ding ahi hiam? A mite sa hong puak thei ding ahi hiam?" ci uh hi.

²¹Amaute gen TOPA in a zak ciangin heh mahmah a, Jacob tungah a meikuang khia-in, Israel tungah a thangpaihna khang hi;

²²ahang in, amaute in Pasian um loin ama hutna zong a muang zo kei uh hi.

²³Hi napi amah in tunga huihkhuate thu pia a, vante’ kongpite hongin

²⁴mite nek dingin manna zusak a, amaute van antang a pia hi.

²⁵Mite in vansawltakte’ anlum ne uh a; amaute nek zawh zahzah a pia hi.

²⁶Vante panin nisuahna lam huih khah a, a vangliatna-in leitaw-lam huih a pikhia hi.

²⁷Amaute tungah leivui bangin sa zusak a, tuipi gei sehnel bangin a leng thei vasate a zusak hi.

²⁸Amah in amaute giahphual sung puanbuk kim khempeuh ah a tusak hi.

²⁹Amah in amaute duh mahmah pia ahi manin a khamval dongun a ne uh hi.

³⁰Ahi hangin a duh mahmah uh an a kiheisan ma uh, amaute kam sungah a muam lai nangawnun

³¹amaute tungah Pasian hehna khanga amaute laka a thakhauh pente thatin, Israel tangvalte a phukpai hi.

³²Hizahtak hi napi, amaute mawh lailai uh a; nalamdang hizahta laklak taleh amaute in a um tuan kei uh hi.

³³Tua ciangin a nite uh mawk beisak a, a kumte uh a lauhuaipi-in a beisak hi.

³⁴Pasian in a maute a thah sial in amaute’n amah zong ding uh a; lawptakin amah a zuan kik uh hi.

³⁵Amaute in Pasian, amau Suangpi ahilam, Sang Pen Pasian amaute Tanpa ahilam a phawk uh hi.

³⁶Ahi hangin amaute in amah maitang phat uh a; a leii un amah khem in;

³⁷a lungsim uh ama tungah thutak lo-a, ama thukhun ah a muanhuai kei uh hi.

³⁸Hinapi aman lainat veve a; amau tatkhialhnate maisakin a siasak kei hi. Hun khat khit hun khat a hehna ki-ip a, a thangpaihna a kimin a suahkhia kei hi.

³⁹Amah in amaute ci-le-sa hi in a kileh kik nawn lo huihdam nung bang ahilam uh phawk hi.

⁴⁰Amaute in sehnel-gam ah amah lehdo pahpah in gamtul ah amah lunggimsak tazen uh hi!

⁴¹Amaute in Pasian zia-et kikkik uh a; Israel Siangtho Pa a lunggimsak uh hi.

⁴²Amaute in a vangliatna phawk lo uh a - a nengniamte pan a tatkhiatna,

⁴³Egypt a lim lamdangte a lah nite le Zoan kuala ama nalamdangte a phawk kei uh hi.

⁴⁴Amah in a gunte uh sisan suaksak a; amaute in luite panin tui a dawn thei kei uh hi.

⁴⁵Amah in tho honpi sawl-a amaute gaisak in; uiphukte sawl-a amaute a susiasak hi.

⁴⁶Amah in a ankungte uh kauphe pia a, a ankung gahte uh kaukhuphon a pia hi.

⁴⁷Amah in a lengguite uh gialin siasak a, a theithek gahte uh vukkhalin a siasak hi.

⁴⁸A gannote uh gialpi dengsak a, a gan khawite uh kektangte a dengsak hi.

⁴⁹Ama lungsona amaute tungah kuangsak a, ama thangpaihna, lungkimlohna le galneihna ahi - a siasak vansawltak honkhat a khahkhia hi.

⁵⁰Amah in a heh nading lampi khat bawl a; sihna pan amaute hawi tuan loin pulpi a tungsak hi.

⁵¹Amah in Egypt ta masa khempeuh sattuk a, Ham’ puanbukte sunga pasal hat gah masate a satpuk hi.

⁵²Ahi hangin a mite tuuhon bangin paikhiatpih a; tuute bangin sehnel-gam kantan in makaih hi.

⁵³Amaute bittakin makaih ahi manin a lau kei uh hi; ahi hangin tuipi in a galte uh a tuumcip hi.

⁵⁴Tua bangin amaute a gam siangtho gamgi tun a, a khut taklamin a laksa mualtung gamah a tun hi.

⁵⁵Amaute mai-ah minamte nawhkhiatsak-in, a gamte uh amaute tanh dingin pia hi; amaute inn ah Israel behte a tengsak hi.

⁵⁶Ahi hangin amaute in Pasian zia-et in, Sang Penpa lehdo lai uh hi; ama ngeinakipte a zui kei uh hi.

⁵⁷A pate uh mah bangin ciktak loin muanhuai lo uh a, thalpeu suihkhialh muan theih loh bang uh hi.

⁵⁸Amau munsangte-in amah hehsak uh a; a milimte-un ama hazatna a phonglo uh hi.

⁵⁹Pasian in amau thu a zak ciangin heh mahmah a; Israel a nolh kiuhkeuh hi.

⁶⁰Amah in mite laka a lam a puanbuk, Shiloh a, a munsiangtho a nusia hi.

⁶¹Amah in a thahat thukham singkuang sal tangsak a, a thupina galte khut ah a pia hi.

⁶²A mite namsau thatsak a; ama gouluahte tungah a heh mahmah hi.

⁶³A tangvalte uh mei in kangtum a, a nungakte un mo la a sa kei uh hi;

⁶⁴a siampite uh namsau in that a, amau meigongnute kap zong a kap thei kei uh hi.

⁶⁵Tua ciangin zu pengnawng ihmu khanglo mipa bangin a ihmutna pan Topa a khanglo hi.

⁶⁶Amah in a galte satthuk a; amaute a maizum den dingin a koih hi.

⁶⁷Tua ciangin Joseph’ puanbukte nolh a, Ephraim beh a teel kei hi;

⁶⁸ahi hangin Judah beh teel a, a it Zion Vum a teel hi.

⁶⁹Asannate bangin a munsiangtho lam a, a kipden dinga a phuhsa leitung a bangsak hi.

⁷⁰Amah in a nasempa David teel a, tuuhuangte panin a la hi;

⁷¹amah in tuucing kimlai a mite ahi Jacob, ama goutanh ahi Israel cing dingin amah a puak hi.

⁷²Tuateh David in lungsim citakin amaute cinga; khutsiamtakin amaute a makaih hi.