Read Zokam Phatna-late 79 Bible Online

Phatna-late 79 - Zokam bible

Phatna-late 79

¹Asaph phuah phatna-la khat. Pasian aw, minamte in nangma goutanh sim uh hi; amaute in na biakinnpi siangtho buahsakin Jerusalem leisektawng suah uh hi.

²Amaute in na nasemte’ luangte huih laka leng vasate an dingin pia uh a, na misiangte’ sa leitung gamsate a pia uh hi.

³Jerusalem kimkot tengah tui bangin sisan buakhia uh a, misite a vui ding khat beek a om kei hi.

⁴Ka vengte un kote langbawlin hong neu-et uh a, ka kim ka pam ua omte simmawh le ciamnuihna ka suak uh hi.

⁵TOPA aw, bang tanvei sawt lai ding hiam? Nang heh den ding na hi hiam? Na hazatna bang tanvei mei bangin kuang lai ding hiam?

⁶Nang hong sang lo minamte tung le na min hong sam lo kumpi-gamte tungah na thangpaihna sung in;

⁷ahang in, amaute in Jacob valhtum uh a ama neihsa gam a susia uh hi.

⁸Ka pate uh mawhnate ko tungah hong suan kei inla; gawt dingin hong kikoih ahi manin kote a tuak dingin na lainatna hong tungsak meng in.

⁹Kote Honpa Pasian aw, na minthanna dingin kote hong huh in; nangma min na khualna-in hong hukhia inla ka mawhnate uh hong maisak in.

¹⁰Bang dinga minamte in, "Amaute Pasian koi ah om hiam?" ci ding uh hiam? A kibuakhia na nasemte sisan phu na lakna minamte lakah ka mitmuh un kitheisak in.

¹¹Thongkiate taunate na mai-ah hong tung hen; si dinga kimawhpaihte na ban thahatna tawh humbit in.

¹²Topa aw, nang tunga mawhsakna hong tutte uh, a zah sagihin ka vengte uh ang denna in.

¹³Tua ciangin ko na mite, na lonona a tuute in nang kong phat den ding uh a; akhang akhangin nang phatna ka sim kikkik ding uh hi.