Read Zokam Phatna-late 80 Bible Online

Phatna-late 80 - Zokam bible

Phatna-late 80

¹Tumtheih makaipa ading. "Thukhun unok kungte" aw a sak. Asaph phuah. Phatna-la khat. Israel Cingpa, tuuhon banga Joseph a makaihpa; cherub-te kikal ah tu a,

²Ephraim, Benjamin le Manasseh mai-a a tangkhiapa aw, kote hong za in. Na thahatna phong inla hong pai-in kote hong hon in.

³Ka ngei uh hong bangsak in Pasian aw; kote hong kihotkhiat theih nadingin ko tungah na mai hong taan in.

⁴TOPA Thahatpen Pasian aw, na mite thungetna langkhatah bang tanvei hehsan lai ding na hiam?

⁵Khitui anlum in amaute na vak khin a; kuang-uk dimin amau khitui na dawnsak khin hi.

⁶Ka vengte uh tungah phunna bul nong suaksak a, ka galte un hong zahko uh hi.

⁷Ka ngei uh hong bangsak in a Thahatpen Pasian aw, kote hong kihotkhiat theih nadingin ko tungah na mai hong taan in.

⁸Egypt panin lenggui khat na puakhia a; minamte nawhkhia in tua na suan hi.

⁹Na suan nading mun na hah sianga, tua in zungkha-in gamsung a dim hi.

¹⁰A liim in mualliante tuam a, ahiangte in tamtak liante hiang a liah hi.

¹¹A guipite Tuipi a[136] lam ah zaam a, a hiang neute Gunpi b[137] dongah a zaam hi.

¹²A tawn khate khempeuh in a gah a lawh theih nadingin bang dinga a kulhte sukham na hi hiam?

¹³Tulak a ngal khaatte in phukek uh a, gamlak ganhingte in kivakna-in nei uh hi.

¹⁴A Thahatpen Pasian aw, ko kiangah hong kileh in! Van pan hong ensuk inla mu in! Hih lenggui cing in,

¹⁵a zung na khut taklama na suansa hi a, a tapa c[138] nangmah mah in nang adinga na laptoh ahi hi.

¹⁶Na lenggui kisattat a mei in a kang hi; na mite na taihilh a, a kisia uh hi.

¹⁷Na taklam a mipa nangmah mah in na laptoh mihing tapa tungah na khut nga in.

¹⁸Tua ciangin nang kong taisan nawn kei ding uh hi; kote hong puahpha in, na min kong sam ding uh hi.

¹⁹Ka ngei uh hong bangsak in TOPA Thahatpen Pasian aw; kote hong kihotkhiat theih nadingin ko tungah na mai hong taan in.