Read Zokam Phatna-late 81 Bible Online

Phatna-late 81 - Zokam bible

Phatna-late 81

¹Tumtheih makaipa ading. d[139] tawh kizui-in. Asaph phuah. Eite thahatna Pasian, nuamna la sak un; Jacob Pasian tungah nakpi in kiko un!

²Tumtheih tum kipan unla khuangta satin, harp le lyre kilawmtakin sai un.

³Kha Thak le kha liik, eite Pawi ni-in tuutal’ ki mut un;

⁴hih in Israel adingin thukip hi-a, Jacob’ Pasian biakna ngeinakip ahi hi.

⁵Amah in Egypt sima a paikhiatpih lai-in i theihtel loh e[140] kam i zakna munah Joseph adingin tua ngeina kho a kipsak ahi hi.

⁶Amah in, "Amaute liangko panin tua vangik ka sankhia a; tanglawh panin a khutte uh ka khahkhiatsak hi.

⁷Na lungdon uh ciangin nong sam uh a, hong hukhia in vanging-meiipi lak pan kong dawng a; Meribah tuite ah no kong zia-et hi.

⁸"Ka mite aw, za un, kong vauhilh ding hi - Israel aw, ka thu hong ngai hoh lecin!

⁹Note lakah gamdang pasian na nei kei ding uh a, pemtate pasian bia-in na kun kei ding uh hi.

¹⁰Keimah note Pasian, TOPA, Egypt pana hong paikhiatpihpa ka hi hi. Na kam zapi-in ka in, ka dimsak ding hi.

¹¹"Ahi hangin ka mite in ka thu ngai lo uh a; kei tungah Israel hong kiniamkhiat lo hi.

¹²Tua ahi ciangin amau lungkhauhna tawh kizui-in amau ut bangin ka khahkhong hi.

¹³"Ka mite in kei thu hong ngai uh henla, Israel in ka lampite zui hoh leh,

¹⁴a galte uh manlangtakin zawhpihin, a galte uh lamah ka khut liik ngel ding hi veng in!

¹⁵TOPA a mudahte in a mai ah maivil ding uh a, amau danthuakna a bei ngei kei ding hi.

¹⁶Ahi hangin note mangbuh limci penin hong kivak dinga; suangpi pana khuaizu-in kong taisak ding hi," a ci hi.