Read Zokam Phatna-late 84 Bible Online

Phatna-late 84 - Zokam bible

Phatna-late 84

¹Tumtheih makaipa ading. a[143] bangin. Korah Tapate phuah. Phatna-la khat. Thahatpen TOPA aw, na tennamun ithuai si e!

²TOPA huangte utlua-in ka hinna zawm zawzen a, ka lungsim le ka ci-le-sa in a nungta Pasian a sam hi.

³Thahatpen TOPA, ka Kumpi le ka Pasian aw, na biakna-tau gei ah kawlgit nangawn in omna nei-a, phialphiah in a bud ing leh a no koih nading mun a nei hi.

⁴Na inn sunga tengte thupha ngah hi-a; amau in nang hong phat den uh hi.

⁵A hatna uh nangma tung pan ngaha, na tenna mun lunggulh cinten a khualzinte thupha ngah ahi hi.

⁶Amaute in Baca Kuam nawka a pai lai-un ciktui phulna mun suaksak uh hi; sikhiau guahte in zong bual b[144] a dimsak hi.

⁷Amaute a milipun Zion a Pasian mai-ah a kilak matengun, a tha uh a hat semsem hi.

⁸TOPA Thahatpen Pasian aw, kong thungetna hong za in; Jacob Pasian aw, hong ngai in.

⁹Pasian aw, ka lum c[145] uh hong etsak inla; angvanna tawh na sathau nilhpa en in.

¹⁰Mundang a ni tulkhat om sangin na huang sungte a ni khat om hoihzaw hi; migilote puanbukte sunga ka ten sangin ka Pasian inn a kongkhak cingpa ka hi nuamzaw hi.

¹¹Ahang in, TOPA Pasian in, tungsun ni le lum ahi hi; TOPA in angvanna le pahtawina pia a; a kal suanna kawkbaang lote ading na hoih khat beek a sit kei hi.

¹²A Thahatpen TOPA aw, nang hong muang mi thupha ngah ahi hi.