Read Zokam Phatna-late 85 Bible Online

Phatna-late 85 - Zokam bible

Phatna-late 85

¹Tumtheih makaipa ading. Korah’ Tapate phuah. Phatna-la khat. TOPA aw, na gam na angvan a; Jacob nopsakna a ngei na bangsak hi.

²Na mite tatkhialhna na maisak a, amau mawhnate khempeuh na khuhsak hi.

³Na thangpaihna khempeuh na pampaih a, na hehluatna na kiheisan hi.

⁴Kote Honpa Pasian aw, kote a ngei hong bangsak kik inla ko tunga na lungkimlohnate beisak in.

⁵Kote tungah heh den ding na hi hiam? A khangkhangte tungah na hehna zomsuak ding na hi hiam?

⁶Na mite in nang sung nuam a sak nadingin kote hong puahpha lo ding na hi hiam?

⁷TOPA aw, na itna kip kote hong lakin, na hotkhiatna kote hong pia in.

⁸TOPA Pasian thugen ka ngai ding hi; amah in ama mite, a misiangte tungah lemna hong kham hi - ahi hangin amaute haina lamah kihei kei uh hen.

⁹A minthanna i gam ah a ten theih nadingin amah a kihtate, a hotkhiatna in a nai takpi hi.

¹⁰Itna le muanhuaina kituakkhawm uh a, thumaanna le lemna a kitawp thuk uh hi.

¹¹Lei panin muanhuaina phulkhia a, thumaanna in van pan ensuk hi.

¹²TOPA in a hoih pia taktak dinga, i gam in anlak dinga gahsak ding hi.

¹³Ama mai-ah thumaanna pai-a a kalsuan nading lampi a sial kholhsak hi.