Read Zokam Phatna-late 9 Bible Online

Phatna-late 9 - Zokam bible

Phatna-late 9

¹Tum theih makaipa ading. "Tapa Sihna aw a tum ding" David phatna-la khat. TOPA aw, ka lungsim khempeuhin nang kong phat dinga; nangma nalamdangte khempeuh ka genkhia ding hi.

²Nang sungah nuamin ka kipak dinga; na min phatna ka sa ding hi, Sang Penpa aw.

³Ka galte nungkik uh a; nangma mai-ah muktu in a kisia uh hi.

⁴Ahang in, ka thuneihna le ka thu na lenkip a; na kumpi tokhom ah tu-in thumaanin thu na khen hi.

⁵Minamte na taihilh a, migilote susia-in; a tawntunga manden dingin a min uh na phiatkhia hi.

⁶A mong nei lo kisiatna in galte pha a, amau khuapite na kibulkalh hi; amaute mualsuangte nangawn a kisia mang ta hi.

⁷TOPA in a mang tawntung hi; amah in thukhen nadingin ama tokhom phutkip zo hi.

⁸Amah in thumaanin leitung thu khen dinga; thutangin mite a uk ding hi.

⁹A kinuainette bukna TOPA hi-a, lungkham huna dingin kulhpi ahi hi.

¹⁰TOPA aw, nang in nang hong zongte taisan ngei lo na hi manin, na min hong theite in nang hong muang ding uh hi.

¹¹Zion kumpi tokhom a tu TOPA phatnate sa un; minamte lakah ama sepsate tangko un.

¹²Ahang in, sisan phulapa in phawk a, a thuaksiate kahna a kiphawkmawhbawl kei hi.

¹³TOPA aw, ka galte hong bawlsiat zia mu in! Hong lainat inla sihna kongpite panin kei hong laamto in;

¹⁴tua hileh Zion Tanu kongpite ah nangma phatnate ka pulak thei dinga tua lai-ah nangma hotkhiatna nuam ka sa ding hi.

¹⁵Minamte, amau tawhsa gum sungah kia khin uh a; amau siahsim lenthang ah a khe uh a awk khin hi.

¹⁶Ama thutang hangin TOPA kithei khin a; migilote amau bawlsa thangah a awk uh hi. e[19]

¹⁷Pasian a mangngilh a gilo minamte khempeuh hankhuk f[20] ah a ciah uh hi.

¹⁸Ahi zongin a tasamte kimangngilh suak lo dinga, gimthuakte lametna zong a sia suak ngei kei ding hi.

¹⁹TOPA aw, tho inla mihing gualzosak kei in; nangma mai-ah minamte thu kikhen hen.

²⁰Amaute lausak in, TOPA aw; amaute mihing lel ahina minamte theisak in.