Read Zokam Phatna-late 90 Bible Online

Phatna-late 90 - Zokam bible

Phatna-late 90

¹Pasian mipa Moses thungetna Topa, kote akhang akhanga ka tenna uh mun na hi hi.

²Mualte a suah ma, leitung le leitung mite a kibawlkhiat ma-in atawntung pan atawntung dongin nang Pasian na hi hi.

³Mihingte leivui suaksak kikin, "Mihing tapate aw, leivui ah ciah kik un," na ci hi.

⁴Ahang in, nang muhna ah kum tul khat in a beisa ni khat ahikeh zana vil khat bang bek ahi hi.

⁵Mite, sihna ah ihmu in na phiatkhia a; amaute zingsanga lopa dawnthak a bang uh hi -

⁶zingsangin a thak a mengkhia zongin nitak ciangin vulin a keugawp hi.

⁷Na hehna in kote hong kangtum a, na lungkimlohna in kote hong lausak hi.

⁸Ka tatkhialhnate uh na mai-ah na koih a, ka mawhsimnate uh na omna khuavak ah na koih hi.

⁹Ka nuntak sung nite uh na thangpaihna nuai-ah beimang a, ka nuntak sung kumte uh tauna-in ka beisak uh hi.

¹⁰Ka nuntak sung nite uh kum sawmsagih sawt a - ka hat uh leh kum sawmgiat a sawt hi; tua hinapi tua hun sung kikal a[161] lungkham hun le dah hun hi-a, tuate manlangin bei-in ka lengmang uh hi.

¹¹Na hehna vangliatzia kua in thei ahi hiam? Ahang in na thangpaihna ahileh na kihtakhuai zah mah in lian hi.

¹²Pilna lungsim ka neih theih nadingun ka nuntak sung nite uh simzia hong hilh in.

¹³TOPA aw, hong kileh kik in. Bangtan sawt lai ding na hiam? Na nasemte hong khuatuah in.

¹⁴Ka nuntak sungun lungnopna la sa-in ka kipah theih nadingun zingsangin na itna kip tawh hong taiisak in.

¹⁵Kote nong gimsak ni zahzah le lungkhamna ka tuah uh kum zahzah mah kote hong kipaksak in.

¹⁶Na nasemte tungah na sepsate hong kilak henla, amau tate tungah na thupina kilak hen.

¹⁷Eite Topa Pasian angvanna b[162] eite tungah hong khawl henla; i khuta i septe ei adingin kipsak hen - hihi, ka khut ua ka septe uh kipsak in.