Read Zokam Phatna-late 94 Bible Online

Phatna-late 94 - Zokam bible

Phatna-late 94

¹Phu a lapa Pasian, TOPA aw, phu lapa Pasian aw, tangkhia in.

²Leitung thukhenpa aw, thoto in; a kisatheite amau tawh kituakin thuk in.

³TOPA aw, a gilote bang tanvei, bang tanvei a gilote nuamsa lai ding uh ahi hiam?

⁴Amaute in ki-uatsakna kam bungkhiakhia uh a; a gilo-a gamta khempeuh a kisialsial uh hi.

⁵TOPA aw, amaute in na mite suzan uh a; na gouluahte a nengniam uh hi.

⁶Amaute in meigongnute le pemtate golum uh a; pa nei lote a that uh hi.

⁷Amaute in, " TOPA in mu lo hi; Jacob Pasian in phamawh sa kei," ci uh hi.

⁸No, mite laka bangmah phawk lote aw, thusim un; no mihaite aw, cik ciangin pil ding na hi uh hiam?

⁹Bil khua a zasakpa in za lo ding ahi hiam? mit khua a musakpa in mu lo ding ahi hiam?

¹⁰Minamte a sektatpa in dan tuaksak lo ding ahi hiam? Mite thu a hilhpa in theih loh nei ding ahi hiam?

¹¹TOPA in mihing ngaihsutnate thei a; amaute a mawkna ahilam a thei hi.

¹²TOPA aw, na thukham hilhin na sektat mi thupha ngah hi a;

¹³migilote adingin gum a kitawhsak matengin lungkham huna dingin suahtakna na guan hi.

¹⁴Ahang in, TOPA in ama mite nolh lo dinga; ama gouluahte a taisan ngei kei ding hi.

¹⁵Thumaanna tungah thukhenna kibulphuh kik dinga, tuateh a lungsima thutang khempeuh in a zui ding uh hi.

¹⁶Migilote langah kei adingin kua ding ding ahi hiam? Asia-a gamtate langah kei adingin kua ding ding ahi hiam?

¹⁷TOPA in kei hong huh lo hi leh dai dide-in sihna sungah ka teng khin tham ding hi.

¹⁸"Ka khe tal ei," ka cih ciangin TOPA aw, na itna in kei hong lenkip hi.

¹⁹Ka sungah lunghimawhna a tam luat ciangin nong khamuanna in ka hinna a nuamsak hi.

²⁰Thukipte pansan a gimna a tun - a kisiasa kumpi tokhom tawh nang kipawl thei ding na hi hiam?

²¹Thumaan langkhat ah amaute kipawlkhawm uh a, mawhpengte a si dingin a mawhpaih uh hi.

²²Ahi hangin TOPA ka kulhpi hong suak a, ka Pasian ka belh suangpi hong hi hi.

²³Amah in amau mawhnate bangin thuk kik dinga, a gitlohna uh hangin a susia ding hi; eite Pasian, TOPA in amaute a susia ding hi.