Read Zokam Phatna-late 95 Bible Online

Phatna-late 95 - Zokam bible

Phatna-late 95

¹Hong pai un, TOPA tungah nuamna la sa ni, I hotkhiatna Suangpi tungah nakpi in kiko ni.

²Ama mai-ah lungdamkohna tawh pai-in, tumtheih le la tawh amah ngaih takin phat ni.

³Ahang in, TOPA in a lian Pasian hi a, pasiante khempeuh tunga Kumpi lian ahi hi.

⁴Ama khut sungah leitung thukpite om a, mualdawnte ama aa ahi hi.

⁵Tuipi ama bawlsa ahi manin ama aa hi-a, ama khutin leikeute a bawl ahi hi.

⁶Hong pai un, amah bia in kun ni, eite hong Bawlpa TOPA mai-ah khukdin ni;

⁷ahang in, amah eite Pasian hi-a, ama gankhawk sunga mi ama cinna nuai-a tuuhon i hi hi. Tuni-in ama aw na zak uh leh

⁸Meribah a[166] a na hih bang uh leh sehnel-gam Massah b[167] a na om ni-ua na hih bangun na lungsim uh khauhsak kei un;

⁹tua lai-ah na pate un ka nasepte mu khin napi kei hong zia-et in hong sin uh hi.

¹⁰Tua khangte tungah kum sawmli sung ka heh a, "Amaute lungsim lampialsate hi uh a, ka lampi a thei kei uh hi," ka ci hi.

¹¹Tua ciangin hehsa in ka kiciam a, "Amaute ka khawlna ah a lut ngei kei ding uh hi," ka cikhia hi.