Read Zokam Phatna-late 96 Bible Online

Phatna-late 96 - Zokam bible

Phatna-late 96

¹Lathak khat TOPA sak un; leitung khempeuh aw, TOPA la sak un.

²TOPA la sak unla ama min phat un; nisimin ama hotkhiatna tangko un.

³Minamte lakah ama minthanna pulak unla, mi khempeuh lakah a nasep piandangte pulak un.

⁴Ahang in TOPA lian a, a phattak pen ahi hi; pasiante khempeuh khengin kihtak ding ahi hi.

⁵Ahang in minamte’ pasian khempeuh milimte hi-a, TOPA in ahileh vante a bawl hi.

⁶Ama mai-ah nopcitna na le thupina om a; a munsiangtho sungah hatna le minthanna a om hi.

⁷Minamte innkuante aw, TOPA ahi ding bangin hisak un, TOPA tungah a minthanna le a thahatna bangin hisak un.

⁸Ama min tawh kituakin TOPA minthangsak un; biakna kengin ama huang sung hong zuan un.

⁹Ama sianthona c[168] a thupina tawh kituakin TOPA bia unla leitung khempeuh ama mai-ah ling un.

¹⁰Minamte lakah, "TOPA in uk hi," ci un. Leitung kiptakin kikhosak a kikhin thei lo hi; amah in guptuam paihtuam nei loin minamte thu a khen ding hi.

¹¹Vante nuam uh henla, leitung kipak hen; tuipi le a sunga omte khempeuh kithawn uh hen;

¹²lote le a sunga omte in nuamsa uh hen. Tua ciangin tulak a singkungte khempeuh in nuamna la sa ding uh a;

¹³TOPA hong pai-a, leitung thukhen dingin hong pai ahi manin amaute in a mai-ah la a sa ding uh hi. Amah in thumaanin leitung buppi thu khen dinga, thutakin mite thu a khen ding hi.