Read Zokam Phatna-late 97 Bible Online

Phatna-late 97 - Zokam bible

Phatna-late 97

¹TOPA in uk hi, leitung kipak henla; a gamla-a tuipi geite nuam uh hen.

²Meiipite le khuamial sahpi in amah umcih a; ama tokhom bulpi in thumaanna le thutang ahi hi.

³Ama mai-ah meikuang pai-a, a kim a pama galte a kangtum hi.

⁴A khuaphiate in leitung taana, leitung in mu-in a ling hi.

⁵TOPA, leitung khempeuh Topa mai-ah khuainun bangin mual liante a tuisuak hi.

⁶Vante in a thumaanna tangko uh a, ama minthanna mi khempeuh in mu uh hi.

⁷Bawltawm milim bia a milimte a kisakheihpih khempeuh kimaizumsak ding hi - no pasiante khempeuh aw amah bia un!

⁸TOPA aw, na thukhennate Zion in za-in nuam a, Judah khuaneute a kipak uh hi.

⁹Ahang in, TOPA aw, leitung khempeuh tungah nang Sang Penpa na hi-a; pasiante khempeuh tung pekah hong kitawisang hi.

¹⁰TOPA in ama tunga muanhuaite kemin migilote khut panin amaute hukhia ahi manin amah a itte in gitlohna mudah uh hen.

¹¹A thumaante khuavak in taan a, a lungsima a thutangte lungnopna in a taan hi.

¹²No a thumaante aw, TOPA sungah lungdam unla ama min siangtho phat un.