Read Zokam Phatna-late 98 Bible Online

Phatna-late 98 - Zokam bible

Phatna-late 98

¹Phatna-la khat. TOPA in a piandang nate bawl ahi manin lathak khat amah sak un; a taklam khut le a ban siangtho in ama ading hotkhiatna a sem khin hi.

²TOPA in ama hotkhiatna kitheisak khin a, minamte tungah ama thumaanna a laakkhia hi.

³Amah in Israel innkuante tungah a itna le a muanhuaina phawk khin zo hi; leimongte khempeuh dong in eite’ Pasian hotkhiatna a mu khin uh hi.

⁴Leitung khempeuh aw, lungnuamin TOPA tungah kiko un, tumtheih tumin lungnopna la sakhia zuahzuah un;

⁵harp tumin TOPA tungah gingsak unla, la awging le harp thuahkhawmin

⁶pengkulte le tuutal kite gingkhiasak unla - Kumpipa ahi TOPA mai-ah lungdamin awng un.

⁷Tuipi le a sunga om khempeuh le leitung le a tunga teng khempeuh kithawn hen.

⁸Gunte in a khut uh bengin mualte in lungdamin la sakhawm uh hen;

⁹Leitung thukhen dingin TOPA hong pai ahi manin ama mai-ah amaute in la sa uh hen. Amah in leitung buppi thumaanin thu khen dinga, guptuam paihtuam nei loin mite thu a khen ding hi.