Read Zokam Paunakte 10 Bible Online

Paunakte 10 - Zokam bible

Paunakte 10

¹Solomon’ paunakte: Tapa pil in a pa lungnuamsak a, tapa hai in ahileh a nu dahsak hi.

²Amaan lo-a ngah goute in man nei lo a, thumaanna in ahileh sihna panin hukhia hi.

³TOPA in a thumaante gilkialsak lo a, migilote deihluatna a khaktansak hi.

⁴A thadah khut in, mi zawngsak a, a thanuam khut in ahileh hauhna a tun hi.

⁵Nipi lai-a an khawmpa tapa pil hi-a, anlak huna lumpa ahileh a zahlak tapa ahi hi.

⁶A thumaante in thupha khu uh a, migilote b[21] kam in ngongtatna bekbek a gen hi.

⁷A thumaante phawkna thupha hi dinga, migilote min ahileh a muat ding hi.

⁸Lungpil mi in thupiak sang thei a, mihai kamtam in ahileh siatna a thuak hi.

⁹A citak mi pai hiathiat a, thukawi bawl mi ahileh a kiphawkkhia ding hi.

¹⁰Mi mitsiik-atpa in lungkhamna tuak a, mihai kamtam in siatna tuak hi.

¹¹Thumaan mite kam nuntakna tuikhuk hi-a, migilote kam ahileh ngongtatna in a tuam hi.

¹²Muhdahna in kitotna piangsak a, itna in ahileh khialhna khempeuh khuhcip hi.

¹³Thu theikakte muk ah pilna kimu a, thukhentel lo pa nungzang in ciangduai a thuak hi.

¹⁴Mipil in theihna khol a, mihai kam in ahileh siatna a sam hi.

¹⁵Mihaute hauhna in amau kulh nei khuapi hi-a, mizawngte siatna ahileh zawnna ahi hi.

¹⁶A thumaante thaman nuntakna hi a, migilote sumtum ahileh dantuahna ahi hi.

¹⁷Sektatna a thusim mi nuntakna lampi tawn hi-a, kipuahphat ding a awlmawh lo mi in ahileh midangte lam khialsak hi.

¹⁸A muhdahna a imte mi zuauphuak hi-a, mi gensiat hat peuhmah mihai ahi hi.

¹⁹Thu tampi genna ah mawhna kihel teitei a, a kam ip theite a pil ahi hi.

²⁰A thumaan mite leii ngun hoih pen hi-a, migilote lungsim ahileh man nei lo hi.

²¹A thumaan mi muk in tampi vak a, mihaite ahi uh leh thukhenna a theih loh manun si uh hi.

²²TOPA thupha in hauhna tun a, lunghimawhna a behlap kei hi.

²³Mihai in tatsiat nuamsa a, theihtelna nei mi in ahileh pilna a pakta hi.

²⁴Migilo in a kihtak pen tuak dinga, a thumaante a deihdeih uh kipia ding hi.

²⁵Huihpi in a nawk ciangin migilote mangthang a, a thumaante ahileh kiptakin ding den hi.

²⁶Ha adingin lenggahtui thuk le mit adingin meikhu bangin a sawlpa adingin thadahte tua bang ahi hi.

²⁷TOPA kihtakna in nuntakna sotsak a, migilote nuntak kum a khiapsak hi.

²⁸A thumaante mailam hun lungnopna hi-a, migilote lametna ahileh a guaksuak hi.

²⁹TOPA lampi in thumaan mi belh hi-a, a tatsiate adingin ahileh kisiatna ahi hi.

³⁰A thumaante kibulkalh ngei lo dinga, migilote in ahileh ten nading mun a ngah zo kei ding uh hi

³¹A thumaan mi kam panin pilna suakkhia a, kamsia pauna leii a ki-attan ding hi.

³²A thumaan mi muk in a kilawm thei a, migilo kam in ahileh thukawi bek thei hi.