Read Zokam Paunakte 12 Bible Online

Paunakte 12 - Zokam bible

Paunakte 12

¹Sektatna a it peuhmah theihna it hi a, puahphatna mudahte mihai ahi hi.

²Mi hoih in TOPA angvanna ngah a, zuauphuak mi ahileh TOPA in a mawhpaih hi.

³Gitlohna tawh mi khat kikipsak thei lo a, thumaan mite lah a kibulkalh thei kei hi.

⁴A nampi gamtat zi in a pasal’ kumpi lukhu hi-a, a daisak zi ahileh a pasal guhsung muat tawh kibang hi.

⁵A thumaante’ ngimna thutang a, migilote ngaihsut piakna zuaupi ahi hi.

⁶Migilote thugen sisan ngakin bok-a, a thutangte kampau in ahileh amaute hukhia hi.

⁷Migilote kilawnthalin om nawn lo uh a, a thumaante’ inn ahileh a kip bikbek hi.

⁸Mi khat a pilna tawh kituakin kiphat a, mi lungsim kawite ahileh kineu-et hi.

⁹Nek ding nei lopi mi lian banga om sangin, kuama phawk khak loh-a nasem neih hoihzaw hi.

¹⁰Thumaan mi in a ganhingte sapna thudon a, migilote in ahileh a doppenna uh khelbawlna suak hi.

¹¹Ama leitang a nasempa in an tampi nei dinga, sunmang peuh a geelgeelte thu khentel thei lo ahi hi.

¹²Migilote in mitatsiate van lawkding sawma, mi thumaante zung in gah a gah hi.

¹³Migilopa, mawhna a dim ama thugen mah ah awk-a, mi thumaanpa ahileh lunghimawhna pan a suakta hi.

¹⁴Mi khat a muka a gah panin na hoih tawh kidima, a khuta na a sep laisiah pahtakman ngah tektek hi.

¹⁵Mihai khat lampi ama aa in aman tawh kibanga, mipil in ahileh mi thungaihsutpihna a ngai hi.

¹⁶Mihai in a hehna kilangsak paha, a kidawm thei mi in a ki-engkona awlmawh lo hi.

¹⁷Thutak teci in thumaanin teci panga, zuau tecipa in zuauthu a gen hi.

¹⁸Kamkhauh in namsau bangin sunlet a, mipilte kampau in ahileh a damsak hi.

¹⁹Thutak gen muk kip dena, thuzuau gen leii ahileh tomvei sung bek kimang hi.

²⁰Gitloh sawmsimte lungsim ah zuauthu tenga, lemna a khangsakte ahileh a lungnuam hi.

²¹A thumaante in siatna tuak lo uh a, migilo ahileh a thuakkhop buaina in bawm hi.

²²TOPA in zuau genna muk kih a, mi thutakte a pakta hi.

²³A kidawm thei mi in a theihna kem khinkhian a, mihaite lungtang in a haina pholaklak hi.

²⁴A thanuam khutte in uk dinga, thadahna in ahileh mi sila a suaksak hi.

²⁵Lunghimawhna in mi lunglelsak a, migit kam in ahileh ama lungtaisak hi.

²⁶A thumaan mi kilawmtakdan siam a a[22] migilo lampi in ahileh amaute lam pialsak hi.

²⁷Mi thadah in a samatsa haang b[23] nuam lo a, mi thanuamte neihsate ahileh manpha hi.

²⁸Thumaanna lampi ah nuntakna om a; tua lampi dungah siattheihna om lo hi.