Read Zokam Paunakte 14 Bible Online

Paunakte 14 - Zokam bible

Paunakte 14

¹Numei pil in a inn lama, numei hai in ahileh ama khut mah in a inn phel hi.

²Thutanga kalsuan mi in TOPA kihta a, thukawi lampi tawnpa in ahileh amah a simmawh hi.

³Mihaite kampau in a nungzangah ciangduai tusak a, mipilte muk in ahileh amaute dal hi.

⁴Bawngtal om lohna ah gankuang hawm a, ahi hangin bawngtal hatna hangin an tampitak kila hi.

⁵A thutak teci in zuau gen lo a, teci maan lo in ahileh zuau a phuak hi.

⁶Mi simmawhte in pilna a zon hangin bangmah mu lo a, thu saikak-theite in theihna mu ziau hi.

⁷Mihai tawh kithuah kei in, ama muk pan theihna na mu kei ding hi.

⁸A kidawm thei mi’ pilna, ngaihsunsun-a gamtatna hi-a, mihaite haina ahileh khemna ahi hi.

⁹Mihaite in mawh maisakna zahpih a, a thutangte lakah deihsakna kimu hi.

¹⁰Lungtang in ama khaatna thei tek a, kuamah dangin a lungnoppih thei kei hi.

¹¹Migilote’ inn kisusia dinga, a thutangte’ buk ahileh a gina semsem ding hi.

¹²Mi khat adingin amaan hileh kilawm lampi khat om a, ahi hangin tua in a tawpna ah sihna a tun hi.

¹³Nuih kawm nangawnin lungsim na thei a, lungnopna zong dahna-in kikhum thei hi.

¹⁴Muanna nei lo mi a gamtatna bangin kithuk dinga, mi hoih in ahileh pahtakman sang ding hi.

¹⁵Mimawl in na khatpeuh um a, a kidawm thei mi in a kalsuan nading a ngaihsun hi.

¹⁶Mipil in TOPA kihta-in gitlohna peel a, mihai in ahileh ngaihsun khol loin amtat hi.

¹⁷A hehbaihte hai gamtat a, a gitloh pilte kimudah hi.

¹⁸Mimawhte in haina luah a, a kidawmtheite ahileh theihna kikhusak hi.

¹⁹Mi hoihte a omna ah mi hoih lote kun in, thumaan kongpite ah migilote kun ding uh hi.

²⁰Mizawngte, a vengte nangawn in pel uh a, mihaute in lawm tampi nei uh hi.

²¹A vengpa a simmawhte a mawh hi-a, a tasamte tunga migite thupha ngah ahi hi.

²²Gitloh sawmsimte lamkhial hi lo hiam? Hoih a sawmte in ahileh itna le muanhuaina lawhtak a[25] hi.

²³Nasep haksa khempeuh metna hi-a, kamsik lel pen zawnna bek ahi hi.

²⁴Mipilte hauhna amau lukhu hi-a, mihaite haina in ahileh haina mah a suah hi.

²⁵A thutak teci in nuntakna honkhia a, teci zuau in ahileh zuau a phuak hi.

²⁶TOPA a kihta mi, kulh muanhuai nei hi-a; a tate adingin bukna hi ding hi.

²⁷TOPA kihtakna in nuntakna tuikhuk hi-a, sihna thangte panin mi khat kipelhsak hi.

²⁸Gammi tamna in kumpipa’ minthanna hi a, a uk ding mi om kei leh kumpitapa kisia hi.

²⁹A lungduai mi, theihtelna lianpi nei hi-a, a lungtom mi ahileh a haina pulak lel ahi hi.

³⁰Lungnopna in pumpi adingin nuntakna hi-a, enna in ahileh guhte a muatsak hi.

³¹Mizawngte a nengcipte, amaute a Bawlpa simmawh hi-a, a tasamte tungah migi peuhmah Pasian pahtawi ahi hi.

³²Tuahsiatna a tun ciangin migilote tavai uh a, thumaante in ahileh sihna nangawn ah bukna nei lai uh hi.

³³Thu theikakte lungsim ah pilna giak a, mihaite lak nangawn ah amah le amah a kitheisak a[26] hi.

³⁴Thumaanna in minam tawisang a, mawhna ahileh mi khatpeuh adingin mindaina ahi hi.

³⁵A pil nasempa tungah kumpipa lungkima, a zumhuai nasempa in ahileh thangpaisak hi.