Read Zokam Paunakte 17 Bible Online

Paunakte 17 - Zokam bible

Paunakte 17

¹Kiselsa-in inn dima pawi a[32] bawl sangin kilem diamdiamin daitaka an kangkeu nek hoihzaw hi.

²Nasem pil in tapa gina lo uk dinga, unau khat bangin goutanh a ngah ding uh hi.

³Sik huantuina ah ngun kizia-et in, pummei ah kham kizia-et a, TOPA in ahileh lungsim a zia-et hi.

⁴Migilo in kampau gilo ngai-a, zuautheite in mi a nasak leii a thusim uh hi.

⁵Mizawngte a simmawh mi in amaute a Bawlpa simmawh hi-a; siatna tunga kisathei peuhmah dan tuak loin a om kei ding hi.

⁶Khanghamte adingin tate’ tate kumpi lukhu hi-a, nu-le-pa ahileh a tate angtanna ahi hi.

⁷Mihai in kisaktheihna kamte b[33] a zat ding kilawm lo hi - gam-uk khat in zuau a gen ding kilawm kei zaw ngel ve!

⁸Golhsum, a pia mi adingin ai hi-a; a kiheina peuhpeuh ah mavang hi.

⁹Khialhna a maisakte itna a khangsak hi-a, khialhna a hih teiteite lawmta khenkhen ahi hi.

¹⁰Mihai khat khauteepa za vei sat sangin thu theikak mi khat khatvei taihilh phatuamzaw hi.

¹¹Migilo in lehdo bek sawm a, hehpihna nei lo ulian khat ama langah kisawl ding hi.

¹²Mihai khat tawh a haitat laitaka kituah sangin vompi a no kilaksak tawh kituah hoihzaw hi.

¹³Mi khat in a hoih, gitlohna tawh a thuk leh thusia in a inn lawi ngei lo ding hi.

¹⁴Kitot kipatna in tuicinna keh tawh kibanga; kisel ma-in khawl zawk ding ahi hi.

¹⁵Mawhnei mi khahkhongna le mawhpeng khat mawhpaihna - TOPA in kih tuak hi.

¹⁶Mihai in pilna ngah ding a lunggulh loh nungsang ama khuta sum om bang phatuam ahi hiam?

¹⁷Lawm khat in hong it tawntung a, sanggam pen haksat huna dinga suak ahi hi.

¹⁸Thukhentel thei lo mi in kiciamna-in a khut benga, a vengpa ngaih muangsak hi.

¹⁹Kitot uukte mawhna it hi-a; kongpi sangpi-a bawlte kisiatna sam ahi hi.

²⁰Lungsim kawi nei mi a daupai lo a; zuauthu gente in lungkhamna tuak hi.

²¹Tapa hai neite dah mahmah a; mihaipa hangin a pa lungnuam lo hi.

²²Lungtaina in zatui hoih hi-a, lungsim tapzanna in guhte keusak hi.

²³Migilo in thutang a lehhek nadingin golhsum sang sim hi.

²⁴Thu-theikak mi in pilna enkawm gige a, mihaite mit ahileh leimong dongin vak kawikawi hi.

²⁵Tapa hai a pa adingin lungkhamna hi-a, a pianna nu adingin khaatna ahi hi.

²⁶Mawhpeng mi khat dan tuahsak hoih lo a, amau cihtakna hangin uliante sat zong hoih lo hi.

²⁷Theihna nei mi pau mengmeng lo a, theihtelna nei mi ki-ip thei hi.

²⁸Mihaite nangawn dai dide-in om leh apil kisa a, pau loin om leh thutheikak kisa hi.