Read Zokam Paunakte 18 Bible Online

Paunakte 18 - Zokam bible

Paunakte 18

¹A tangtat mite a huaiham hi-a, mantaka kikhensa thu a tokbuai hi.

²Mihai in theihtelna nuamsa lo a, ama ngaihsut bek gen leh nuam sa hi.

³Gitlohna hong tun ciangin simmawhna in zui-a, maizumna hong tun ciangin mindaina in zui hi.

⁴Mihing kampaute tui thukpi hi-a, pilna khuk ahileh lui luanglai ahi hi.

⁵Migilote guptuam hoih lo a, mawhpengte thutang taansak zong hoih lo hi.

⁶Mihai muk in kitotna tun a, a kam in sat thuaksak hi.

⁷Mihai kam ama siatna hi-a, a hinna adingin a mukte thang ahi hi.

⁸Mi gensiate kampau an lim mahmah tawh kibang a, mihing sungtawng ah tumsuk pah hi.

⁹A nasep sem nuamlopa, a susiapa sanggam ahi hi.

¹⁰TOPA’ min pen tausang muanhuai hi-a; thumaante in beelin galmuang uh hi.

¹¹Mihaute hauhna amau kulh muanhuai nei khuapi hi-a; kuama kal zawh loh kulhin ngaihsun uh hi.

¹²Mihing lungsim kisiat ma-in kiphatsakna masa a, pahtawina ma-in kiniamkhiatna masa hi.

¹³Ngai nai lopi-a dawng kik pa ama haina le maizumna ahi hi.

¹⁴Mihing lungsim in a cinatna thuak zo napi, lungsim kitamzan kua in thuak zo ding hiam?

¹⁵Thu theikak mi lungsim in theihna ngah a; mipilte bil in theihna a zongkhia hi.

¹⁶Letsong in a piapa lampi hong a, miliante kiang a tun hi.

¹⁷A thulangpa mai pai-in a kidot masiah thu sung masa pen amaan tawh kibang hi.

¹⁸Ai teelna in kitotna vengsak a, kilangneih-luatnate beisak hi.

¹⁹Kulha ki-um khuapi lak sangin sanggam kinuak lep haksazaw a, a kitotnate uh a kikalhcip khuapi kongkhakte tawh kibang hi.

²⁰Mi, ama kampau gah panin gilvah a; a muka a genna panin a tai hi.

²¹Leii in nuntakna le sihna vang nei a, a leii it mi in a leii gah ne ding hi.

²²Zi a mu mi, na hoih mu hi-a, TOPA’ angvanna ngah ahi hi.

²³Mizawngte in lainat nadingin thum uh a, mihaupa in kamkhauhin a dawng hi.

²⁴Kithuahpih tampi a neite kisia thei a, ahi hangin sanggam sangin a kicianzaw lawm a om hi.