Read Zokam Paunakte 19 Bible Online

Paunakte 19 - Zokam bible

Paunakte 19

¹Thukawi bawl mihai khat sangin, a kalsuanna a kawkbaang lo mizawng khat hoihzaw hi.

²Theihna nei lopi-in aamna hoih lo a, kinawh lua-a lamhaihna zong hoih tuan lo hi.

³Mihing haina in a nuntakna siasak a, tua hi napi a lungsim in TOPA ngawh lai hi.

⁴Hauhna in lawm hausak a, mizawngte ahileh a lawmpa in taisan hi.

⁵Teci maan lo in dan tuak loin om lo dinga, zuau phuakpa zong suakta lo ding hi.

⁶Mi tampite in gam-ukpa mai-et uh a, letsong a pia mi peuhmah ama lawm ahi hi.

⁷Mizawngpa a tanaute khempeuh in taisan uh hi - a lawmte in pelzaw san lo ding hiam! Amah thumin nungdelh ta leh, muhkhakin a[34] om lo uh hi.

⁸A pilpa in a hinna it a; theihtelna a paktate a daupai hi.

⁹Teci maan lo in dan tuak loin om lo dinga, zuau phuakte mangthang ding uh hi.

¹⁰Mihaite a noptat ding kilawm lo a - sila in uliante a uk ding siazaw tham hi!

¹¹Mi khat a pilna in lungduaisak a, langpanna, kimuhmawhbawlna in ama minthanna ahi hi.

¹²Kumpipa lungsona in humpinelkai hawk banga, a angvanna ahileh lopa tunga daitui bang hi.

¹³Tapa hai, a pa kisiatna hi-a, kitot hat zi in inn kehkeh tawh kibang hi.

¹⁴Innte le hauhna nu le pa pana kiluah hi-a, a thukhual zi ahileh TOPA pan ahi hi.

¹⁵Thadahna in ihmumu sak a, a polhteh mi gilkial ding hi.

¹⁶Lamlahnate a mang mi, a nuntakna kem hi-a, a lampi a awlmawh lote, si ding hi.

¹⁷Mizawngte tunga migite TOPA a leitawisak hi-a, ama sepsa hangin pahtakman a pia ding hi.

¹⁸Lametna a om lai-in na tapa sek in; a sih nading lamah awi-am kei in.

¹⁹A lungso mi in dan tuak pelmawh dinga; hukhia lecin na hut kik kul ding hi.

²⁰Thu kuppihna ngai inla, kilamlahna sang in; tua hileh a tawpna ah na pillawh ding hi.

²¹Mihing lungsim in tampi geel-a, ahi zongin TOPA ngaihsut mah taksuak hi.

²²Mihing lunggulh a bei ngei lo itna a[35] hi-a, zuauphuak khat hih sangin zawn hoihzaw hi.

²³TOPA kihtakna in nuntakna tun a, a tuaci mi, lungkimtak tawlnga in, lungkhamna in sukha lo ding hi.

²⁴Mi zongzaw in ankuang sawkin; a kam nangawn a tun zo kei ding hi.

²⁵Mi simmawh khat sat le cin, mimawlte in kidop siamna sin ding uh a, thu thei mi khat taihilh le cin, theihna ngah ding hi.

²⁶A pa aa sut-a, a nu a hawlkhia tapa, maizumna le mindaina tun ahi hi.

²⁷Ka tapa aw, lamlahna na ngaih nawn kei leh theihna panin na pial ding hi.

²⁸Amaan lo teci in thutang simmawh a, migilo in thusia a nawmvalhsuk hi.

²⁹Dan piaknate pen mi simmawhte ading le, satna pen mihaite nungzang ading kibawlkhol ahi hi.