Read Zokam Paunakte 2 Bible Online

Paunakte 2 - Zokam bible

Paunakte 2

¹Ka tapa aw, ka kammalte na san a, ka thupiakte na sungah na khol leh,

²pilna lamah na bil ngatin, na lungsimin theihtel na sawm leh,

³thuthuk samin, awngin theihtelna na sap leh,

⁴ngun bangin na zon a, a kisel gou bangin na zon leh,

⁵tua ciangin TOPA kihtakna na thei pan dinga, Pasian theihna na mu ding hi.

⁶Ahang in, TOPA in pilna pia-a, a kam panin theihna le theihtelna a pusuak hi.

⁷Amah in a thutang mi adingin gualzawhna kholsak-a, a kawkbaang lo-a kalsuan mi adingin lum ahi hi;

⁸amah in thutangte gamtatna cinga, ama tunga muanhuaite’ lampi a hu hi.

⁹Tua ciangin thumaan thutang le a kilawm a kituak lampi hoih bang hiam cih na theitel ding hi.

¹⁰Ahang in na lungsim ah pilna hong lut dinga, na hinna in theihna nuam a sa ding hi.

¹¹Theihkakna in nang hong hu dinga, theihtelna in nang hong cing ding hi.

¹²Pilna in migilote lam pan, thu lehgen mite pan,

¹³lampi tang nusia a, khuamial lampi a tawnte pan,

¹⁴khialna bawl nuam sate le gilo-a lehtatna-a lungkimte pan,

¹⁵a lampi uh kawi-a, a lampi un a lehkhemte panin nang hong honkhia ding hi.

¹⁶Tua in, angkawmnu pan, uklah zi zolsiamna kamte pan,

¹⁷a neulawm nusia a, Pasian a[5] mai-a a thuciam a thusim lo numei panin zong hong honkhia ding hi.

¹⁸Ahang in, tuanu inn in sihna ah hong pi a, a lampi in misite khate lam zuan hi.

¹⁹Tuanu kianga paite kuamah kileh kik lo-in, nuntakna lam a tawn kei uh hi.

²⁰Tua bangin mihoihte lampi na zui dinga, a thumaante lampi na tawn ding hi.

²¹Ahang in, thutangte leitungah teng dinga, a kawkbaang lote, a teng den ding uh hi;

²²ahi zongin migilote leitung panin kibotkhia dinga, a muanhuai lote a kibalsat ding hi.