Read Zokam Paunakte 20 Bible Online

Paunakte 20 - Zokam bible

Paunakte 20

¹Zu in mi simmawhsak a, zucil in mi kilaisak hi; tuate lamkhialhsak peuhmah a pil lo ahi hi.

²Kumpipa thangpaihna, humpinelkai hawk tawh kibang a; amah a hehsakte in a nuntakna tanlawh hi.

³Kisel ding a kidaam mi, mite in pahtawi a, a hai peuhmah lah a kitawng pahpah hi.

⁴Mi zongzaw in lokhawh hunin kho lo a; anlak hunin a lak ding bangmah a om kei pah hi.

⁵Mihing lungtupte tui thukpi hi-a, a theitel mi in ahileh tuate a dimkhia hi.

⁶Mi a tamzaw in itnakip nei-in kigen ciat uh a, ahi zongin mi muanhuai kua in mu zo ding hiam?

⁷A thumaan mi, kawkbang loin nungta a; ama nunga a tate in thupha ngahlawh uh hi.

⁸Thukhen dingin kumpipa a tokhom ah a tut ciangin gitlohna khempeuh a mit in haihkhia hi.

⁹Kua in, "Ka lungsim a siangtho-in ka kem a; mawh nei loin ka siang hi," ci thei ahi hiam?

¹⁰Tawisuang kikim lo le tehna kikim lo - a nihin TOPA in kihkhawm hi.

¹¹Naupang nangawn a gamtatzia panin a sianthona le a thumaanna kithei hi.

¹²Khuazakna bilte le khuamuhna mitte - tuate gel TOPA bawl ahi hi.

¹³Ihmut nuamsa kei in na zawng ding hi; hak gega in na khamval ding hi.

¹⁴A leite in, "Hoih kei, hoih kei," ci uh a, a paikhiat ciangin lah a vanlei kisialhpih hi.

¹⁵Kham omin ruby tampi om hi; theihna tawh a pau muk ahileh suang manpha takpi ahi hi.

¹⁶Khualmi khat tangin mawhlawh tawi nadinga a piak puansilh la inla, uklah numei tawh a kiciamna ahileh a kiciamna man dingin koih in.

¹⁷Zuauna tawh ngah an khum a, a nung ciangin kam sungah suangtang dim hi.

¹⁸Hong ngaihsutpih thei ding zongin geel inla; makai na neih ciang bekin galsim pan in.

¹⁹Mi gensiatna in muanna beisak ahi manin a kamtam luate peel in.

²⁰Mi khat in a nu hiam, a pa hiam a hamsiat leh kawhawm mial sungah a meivak kisumit ding hi.

²¹Acila gouluahna ngahpah, a tawpna ah thupha hi lo hi.

²²"Na khialhna hong thuk na ve’ng," ci kei in. TOPA ngak in, ama’n hong hu ding hi.

²³TOPA in tawisuang kikim lo kih a, tehna maan lo in amah lungkimsak lo hi.

²⁴Mi khat kalsuannate TOPA uk ahi hi; kua in ama lampi theitel thei ding ahi hiam?

²⁵Na khatpeuh mawk-appak a, a kiciamna nung ngaihsut mihing adingin thang suak hi.

²⁶A pil kumpi in migilote haihkhia a, an cilna lengpei a hualsak hi.

²⁷TOPA meivak in mihing kha a[36] zonga, a sungtawng dong zongkhia hi.

²⁸Itna le muanhuaina in kumpipa humbit a; itna tungtawnin a tokhom kip hi.

²⁹Khangnote minthanna in a thahatna uh hi-a, putekte thupina in a samkang uh ahi hi.

³⁰Vuakna le liamma in gitlohna siangsak a, satna in a sungtawng dong khuahsiang hi.