Read Zokam Paunakte 24 Bible Online

Paunakte 24 - Zokam bible

Paunakte 24

¹Migilote eng kei inla, amaute tawh kikhawl nuam kei in;

²ahang in a lungsim un ngongtat ding sawmsim a, a mukte-un mi buaisak nading bek gen uh hi.

³Pilna-in inn kilam a, theihtelna tungtawnin kip hi;

⁴theihna tungtawnin a inndeite, a manpha gou melhoih tuamtuam tawh kidim hi.

⁵Mipil in vanglianpi nei a, theihna nei mi in thahatna a khangsak hi;

⁶ahang in, galsim nadingin makai, gualzawh nadingin thukuppih tampi na kisam hi.

⁷Mihai adingin pilna sang lua a; kongpi-a kikhopna ah gen ding a nei kei hi.

⁸Gitloh a sawmsim mi, a phuangkhiapa in kingawh ding hi.

⁹Hai phuangkhiatna mawhna hi-a mi simmawhpa mite in kih hi.

¹⁰Lungkham hunin na lung aneu leh a hat het lo na hi ve!

¹¹Sihna lam zuana kipaipihte hukhia inla; a kigo dinga kikaite lehkaih in.

¹²"Hih thu thei kei ung," na cih khak uh leh lungsim khingkhaipa in thei lo ding hiam? Na nuntakna a cingpa in thei lo ding hiam? Mikim a gamtatna tawh kizui-in thuk lo ding ahi hiam?

¹³Ka tapa aw, khuaizu ne in, lim hi; khuailu-a khuaizu khum na sa ding hi.

¹⁴Na hinna adingin pilna a khum lam zong thei in; pilna mu le cin mailam ah nang adingin lametna om a, na lametna a mongbei kei ding hi.

¹⁵Thu palsat khat bangin a thumaan mipa’ inn bukin bok kei inla a tenna mun luh kei in;

¹⁶ahang in a thuman mi khat sagih vei a puk zongin tho kik a, migilote ahileh vangsiatna in a pusuaksak hi.

¹⁷Na galpa a puk ciangin awi lua kei inla; a kimuktuk ciangin kilungnuamsak kei in;

¹⁸na tua cih leh TOPA in hong mu dinga, lungkim loin ama tunga a thangpaihna damsak kha ding hi.

¹⁹Migilote hangin lunglel kei in, amaute eng kha kei in,

²⁰ahang in migilopa in mailam ah lametna nei lo a, migilote’ meivak kisukmitsak ding hi.

²¹Ka tapa aw, TOPA le kumpipa kihta inla, a lehdote pawl kei in,

²²ahang in tuate gel in amaute tungah siatpakna tungsak ding hi, a tunsak theih uh siatna kua in thei ahi hiam?

²³Hihte zong mipilte gen thuthuk ahi hi: Thukhenna ah deidan neih a hoih kei hi:

²⁴A khialte tungah, "Nang mawhpeng na hi hi," a ci peuhmah - mite in hamsiat in minamte in langgen ding uh hi.

²⁵Ahi hangin a mawhte mah mawh tangsakte tuahpha dinga, ama tungah hauhna thupha tampi a tung ding hi.

²⁶Limtaka kidawnkikna in muka kitawp tawh kibang hi.

²⁷A pualama na nasep zo photin na lokhawh zo phot inla; tua khit ciangin na inn lam in.

²⁸A thu om lopi in na vengpa langah teci pang kei inla, zuauthu genna-in na muk zang kei in.

²⁹"Kei hong bawl bangin amah bawl ning; ama sepsa mahin amah thuk kik ning," ci kei in.

³⁰Zongzawte lo gei-ah ka pai a, thu khentel theilopa lenggui huan ka nawk hi;

³¹mun khempeuh ah lingkungte selto a, leitung teng kiakin tuamin suang kulhte kicim khin hi.

³²Ka tuahkhakte ka lungsim ah ka bulh a, ka muhsa panin thu khat ka sinkhia hi:

³³Tomkha sung ihmut, tomkha sung lusuk, tomkha sung khawla khutzep sungin -

³⁴misuampa bangin na tungah zawnna hong tung dinga, galphawn a[46] bangin taksapna hong tung ding hi.