Read Zokam Paunakte 25 Bible Online

Paunakte 25 - Zokam bible

Paunakte 25

¹Hihte in Judah kumpipa Hezekiah’ mite tei, Solomon’ paunak dangte ahi hi:

²Thu ipna in Pasian minthanna hi-a; thu zonkhiat in kumpite minthanna ahi hi.

³Vante sanga leitung a thuk bangin kumpite lungsim a kizongkhia thei kei hi.

⁴Ngun panin a ek lakhia leng ngunsekpa adingin b[47] vanzat suak a;

⁵kumpipa mai panin migilote hawlkhia leng thumaanna tungtawnin a tokhom kip ding hi.

⁶Kumpipa mai ah kitawisang kei inla, mi liante lakah mun la kei in;

⁷amah in ulian khat mai-ah hong niamkhiat sangin, "Hiah hong tu to ou," hong cih ding hoihzaw hi. Na mita na muh peuhpeuh

⁸thukhenzum tun c[48] pahpah kei in; na vengpa in hong maizumsak leh a tawpna ah bang lawh ding na hi hiam?

⁹Na vengpa tawh na thuneih na kinial leh midang in nang hong muanga hong koh thusim genkhia kei in;

¹⁰tua hi kei leh hong zapa in hong maizumsak dinga, na minsiatna bei ngei lo ding hi.

¹¹A hun liana kampau tuah, ngun pek tunga kham apple gah tawh kibang hi.

¹²Thu a ngai mite tungah mipil khat taihilhna in, kham bilbah ahikeh kham citak kizepna tawh kibang hi.

¹³Thupuak muanhuai in a sawlte adingin anlak huna vuktui vot tawh kibang a; a pute lungsim thaksuaksak hi.

¹⁴Letsong a piak lohpi a kisialhpihpa guah a paii lo meii le huih bang ahi hi.

¹⁵Lungduaina tawh gam-ukpa kithuzawh thei a, kamnem in guh a tansak thei hi.

¹⁶Khuaizu na muh leh na kham dong bek ne in - tamlua leh na lua ding hi.

¹⁷Na vengte inn ah hawh mun lua kei in - na hawh mun luat leh hong mudah ding uh hi.

¹⁸A vengte langah a maan lo teci pangte, khetbuk, namsau le thaltang hiam tawh kibang hi.

¹⁹Lungkham huna mi muanhuai lo muankhak, hatok le khebai tawh kibang hi.

²⁰Lunggim mi khat zaka lasapa, ahikeh khuadam ni-a puansuahpa ta-ngal laka zuthuk sun tawh kibang hi.

²¹Na gal a gil a kial leh a nek ding an pia inla; a dang a tak leh a dawn ding tuisik pia in.

²²Tua bangin hih lecin a luzangah mei-am a vumsak na hi dinga, tuateh TOPA in pahtakman hong pia ding hi.

²³Leilu-lam huih in guah a puak bangin mi helhotna leii in heh mai a suaksak hi.

²⁴Kitot hat zi tawh inn khata tenkhawm sangin inntung kiu khata ten hoihzaw hi.

²⁵Gamlapi pana thupha in a hingimte adingin tuivot tawh kibang hi.

²⁶Mi thumaan khat in migilo khat a zuihkhak, tuinak buan le tuikhuk nin tawh kibang hi.

²⁷Khuaizu tam nek luat hoih lo a, hong pahtawi nadingin pahtawi-theihna zon zong hoih lo hi.

²⁸Amah ki-uk zo lo mi khat, a kulh kicimsa khuapi tawh kibang hi.