Read Zokam Paunakte 27 Bible Online

Paunakte 27 - Zokam bible

Paunakte 27

¹Zingciang kimasialhpih kei in, ahang in ni khat in bang piang ding cih na thei kei hi.

²Nang kamin kiphat kei inla, midang kiphatsakzaw in; nang muk hi loin midang khatpeuh hizaw hen.

³Suangtum gik a, sehnel vangik ahi hi; mihai khat hehsakna tuate gel sangin gikzaw hi.

⁴Hehna gamhtat a, lungsona in hong tuamcip hi, hazatna kua’n thuak zo ding hiam?

⁵A simthama itna sangin a langtanga taihilhna hoih zaw hi.

⁶Lawm khat in hong liamsak leh hong deihsakna hi thei-a; gal khat in hong biangtawp leh hong lehbawlna ahi hi.

⁷A gilvahte in khuaizu kih a, a gilkialte in akha nangawn khum sa hi.

⁸A inn pana vakthapmangte a bu haih vasa bang ahi hi.

⁹Paknamtui le gim namtui in mihing lungsim nuamsak a, i lawmte khat in deihsaktaka hong kuppihna pan nopna hong phul hi.

¹⁰Na lawmpa mangngilh ke’n la, na pa’ lawmpa zong mangngilh kei in; tuahsiatna in hong vat ciangin na sanggampa inn ah pai kei in - gamlapi a om sanggampa sangin i kianga om innvengpa hoihzaw hi.

¹¹Ka tapa aw, pil inla, ka lung nuamsak in; tuateh kei hong simmawhbawlte ka dawng thei ding hi.

¹²A kidawm thei mi in launa mu in bu-a, mimawl in ahileh phusuakin thuaklawh hi.

¹³Khualmi khat tangin mawlawhtawi nadinga a piak puansilh la inla, uklah numei tawh a kiciamna ahileh tua adingin koih in.

¹⁴Mi khatin a vengpa zingkhangpi in aw ngaihtak tawh thupha a piak leh a hamsiatin kisang ding hi.

¹⁵Kitot hat zi in guahciin ni-a inn kehkeh tawh kibanga;

¹⁶tuanu khoh in - huihpi khoh ahikeh khut a sathau pham tawh kibang hi.

¹⁷Sik in sik mah hiamsak a, mi in mi mah hiamsak hi.

¹⁸Theikung cingte in a gah ne dinga, a pu a kemte kipahtawi ding hi.

¹⁹Tui in maitang a leng kik bangin mihing lungsim in a mi mah leng kik hi.

²⁰Sihna le suksiatnate a[50] in phazosak hun nei lo a, mihing mit zong tuaci hi.

²¹Sik huantuina ah ngun, pummei ah kham kizia-et a; mihing ahileh a ngah phatna pan kizia-et hi.

²²An suk bangin mihai khat sum ah na suk hangin a haina na kolhsak kei ding hi.

²³Na tuuhonte omzia hoihtakin thei inla, na bawnghonte hoihtakin kem in;

²⁴ahang in, hauhna kipden lo a, kumpi lukhu zong khang tawntungin a kipsuak kei hi.

²⁵Lopa keu kihahsiangin a thak po a; mualtunga lopate a kikhop ciangin

²⁶tuuhonte in puansilh hong guan ding uh a, keelte in na lo man hong pia ding uh hi.

²⁷Nang le na innkuanpih kivak nading le na nasem numeinote kham dingin keelnawi tampi na nei ding hi.