Read Zokam Paunakte 29 Bible Online

Paunakte 29 - Zokam bible

Paunakte 29

¹Tamveipi taihilh khita lungkhauh teiteite thakhatin kisia ding uh a - a kibawl thei nawn kei ding uh hi.

²Mi thumaante a khantoh ciangin mite nuam uh a, migilote’n a uk ciangin mite tau uh hi.

³Pilna a it mi in a pa lungdamsak a, numei kizuakte tawh a kikhawlte ahileh a neihsa a mawkzat bei ahi hi.

⁴Kumpipa in thutang tawh a gam kipsak a, golhsum-a huaihampa ahileh a khenkham ahi hi.

⁵A vengte a maitang phatte a khe awk nading lenthang kam ahi hi.

⁶Migilopa a mawhna mah ah awk a, a thumaanpa ahileh nuamin la a sa thei hi.

⁷Mi thumaan in mizawngte tungah thutang a bawl ding khual a, migilo in tua bang deihsakna a nei kei hi.

⁸Mi simmawhte in khuapi sosak a, mipilte in ahileh hehna a vengsak hi.

⁹Mihai khat le mipil khat zum ah a kikhiat leh mihaipa hehin selpho a, kilem thei lo uh hi.

¹⁰Sisan suah nuamte in mi citakte mudah a, a thutangte thah a sawm uh hi.

¹¹Mihai in a hehna teng pulak khin a, mipil in ahileh amah le amah ki-ip zo hi.

¹²Gam-ukpa in zuauthu a ngaih leh a ulian teng migilo suak khin hi.

¹³Mizawngpa le minuainetpa in a kibangin a neih tuak uh hih ahi hi: TOPA in mit khuamuhna pia tuak hi.

¹⁴Kumpipa in mizawngte thu kilawm-kituakin a khensak leh a tokhom kip tawntung ding hi.

¹⁵Bawlphatna ciangduai in pilsak a, ama thu-a gamta naupang in a nu mindaisak hi.

¹⁶Migilo khangto semsem leh mawhna tam semsem a, thumaan mi in ahileh amaute pukna mu ding hi.

¹⁷Na tapa sek lecin hong lungnuamsak dinga, na hinna taiisak ding hi.

¹⁸Kilaakna om lohna ah mite phengtat uh a, thukham zuipa ahileh thupha ngah ahi hi.

¹⁹Kama gen bekin nasem khat kibawlpha thei lo a; a theitel zongin zui tuan lo ding hi.

²⁰A pheng paupau mi na mu ngei hiam? Ama ading sangin mihai khat adingin lametna om zaw hi.

²¹Mi khat in a inntengpa a neu tungin a hawmthawh bawl leh a tawpna ah dahna a[52] a tun ding hi.

²²Mi heh khat in kitotna sosak a, a lungsopa in mawhna tampi a bawl hi.

²³Mi khat a kiphatsakna in niamkhiat a, a lungsim kiniamkhiat mi ahileh pahtawina a ngah hi.

²⁴Guta a pawlpihpa, a galpa hi pah a; amah kiciam ahi manin bangmah a genkhia ngam kei hi.

²⁵Mihing kihtakna thang kikamsa suak dinga, TOPA a muang peuhmah kihumbit ding hi.

²⁶Mi tampi in gam-ukpa maipha zong uh a, ahi hangin TOPA tung pan bekin mihing in thutang ngah hi.

²⁷Mi thumaante in zuauthu kih a, migilote in mi thutang kih hi.