Read Zokam Paunakte 30 Bible Online

Paunakte 30 - Zokam bible

Paunakte 30

¹Jakeh’ tapa Agur thugente - thusuak b[53] khat: Hihpa in Ithiel tung, Ithiel le Ucal c[54] tungah a gen ahi hi:

²"Mihing lakah thuthei-lopen ka hi hi; mihing theihtelna ka nei kei hi.

³Pilna ka sin nai kei a, Siangtho Pa theihna lah ka nei kei hi.

⁴Kua vantung ah kahto in hong kumsuk khin ahi hiam? Kua in a khut kuak sungah huih khawm ngei ahi hiam? Kua in a puantualin tui tun thei ahi hiam? Kua in leimongte khempeuh phutkip ahi hiam? Ama min bang hi-a, a tapa min bang hiam? Na theih leh hong gen dih in!

⁵"Pasian kammal peuhmah melhem lo a; ama sunga bute adingin lum ahi hi.

⁶Ama kammalte behlap kei in, na behlap leh hong taihilh dinga, zuauphuak na suak ding hi.

⁷"TOPA aw, nang tung pan na nih kong ngen hi; ka sih ma-in hong nial kei in.

⁸Zuau genna le khemna tawh hong kigamlasak in; zawnna ahi-a hauhna ahi zongin hong pia kei inla, ka nisim an bek hong pia in.

⁹Tua hi kei leh, hau lua leng nang hong kitheihmawhbawl in, ‘TOPA kua hiam’ ka ci kha ding hi; zawng leng lah guta in ka Pasian min kong daisak kha ding hi.

¹⁰"Nasempa khat a pu tungah gensia kei in, nang hong hamsiat in mawh na khu kha ding hi.

¹¹"A pate uh hamsiat in a nute uh thupha a pia lo mi om hi;

¹²tua bang mite amau mit-a siang a kisate hi-a, a nitna uh lah a siang tuan kei hi;

¹³tua mite kiphasak mahmah uh a, vandak vuauvuau-in mi neumuh uh hi;

¹⁴lei pana mizawngte le mihing laka a tasamte valhtum nadingin a ha uh namsaute hi a, amaute khaguh ah temta kiphut hi.

¹⁵"Vot in tanu nih nei hi; amaute in, ‘Hong pia in! Hong pia in!’ ci-in kiko uh hi. "Kham hun a nei lo na thum om a, ‘Phazo!’ a ci ngei lo li om hi;

¹⁶tuate in: hankhuk a[55], aciing sul, tui tasam leitang le ‘Phazo’ a ci ngei lo mei ahi hi.

¹⁷"Pate simmawh a, nute thuman ding a awlmawh lote’ mit, kuam sunga va-akte in khelkhia-in, musanete in ne ding uh hi.

¹⁸"Lamdang ka sak luat na thum om a, ka theihtel loh li om hi;

¹⁹tuate in: huihkhua-a muvanlai lampi, suangpi tunga gul lampi, tuipi vumte tunga tembaw lampi le nungak le tangval paina lampi ahi hi.

²⁰"Angkawmnu gamtatzia hih ahi hi: An ne in a muk nul a, ‘Khialhna bangmah ka bawl kei hi’ ci hi.

²¹"Leitung a lingsak na thum om a, a kithuak zo lo li om hi,

²²tuate in: nasem khat kumpi suak, mihai ankham,

²³kuama ngaih loh numei khat pasal nei, nasem numei a pi mun suankhia ahi hi.

²⁴"Leitung ah neu mahmah napi a pil lua mahmah na lite:

²⁵Miksite a hat het lo ganhing hi napi, nipi lai-in an khol uh hi;

²⁶Sakikhte b[56] vanglian het lo napi suangheng ah kua bawl uh hi.

²⁷Kauphete in kumpi nei lo napi athuang athuangin gamtakhawm uh hi.

²⁸Innhik, khutin kiman zo napi kumpite innte sungah kimu hi.

²⁹"A pai ciangun thupisuak thum om a, a kalsuan tawh kilawm li om hi:

³⁰gamsate laka thahat pen, bangmah a kihta lo humpinelkai;

³¹a kihisaka pai aklui, keeltal le a kimkot a galkap om c[57] kumpipa ahi hi.

³²"Haitatin nang le nang kitawisang ahikeh gitloh na sawm khak leh na khutin na kam hum ou!

³³Ahang in, bawngnawi toktok leng thawhbat suak a, nak nuai leng sisan a luan bangin hehna so leh kiselna piang hi."