Read Zokam Paunakte 31 Bible Online

Paunakte 31 - Zokam bible

Paunakte 31

¹Kumpi Lemuel thugente - a nu hilhsa thusuak d[58] khat in:

²"Ka tapa aw, ka sunga piang ka tapa aw, ka kiciamna e[59] tapa aw,

³na thahatna numeite tungah zang kei inla, kumpipa susia nuampa tungah na thatang pia kei in.

⁴"Lemuel aw, kumpite hih dinga kilawm lote - kumpite in zu dawn loin, gam-ukte in zucil lunggulh lua kei hen,

⁵dawn le uh thukham’ thukipte mangngilhin, a kinuainette hamphatna khempeuh tansak kha ding uh hi.

⁶A si dekdekte zucil pia inla a lunggimte zu pia in;

⁷dawn uh henla a zawn lam uh mangngilh in, a gentheihna uh phawk nawn kei uh hen.

⁸"Amau thu a gen thei lote tangin gensak inla, neih a nei lote hamphat nadingin pang in.

⁹A kilawm a kituakin kampau-in thu khen in; azawngte le a tasamte hamphatna gupsak in," a ci hi.

¹⁰f[60] A nampi gamtat zi kua in mu zo hiam? Ruby suang sangin manphazaw tham hi.

¹¹A pasal in muang mahmah a, a manpha bangmah a tasam kei hi.

¹²Amah in a pasal tungah a nuntak sungteng siatna tun loin thuhoih a tun hi.

¹³Amah in samul le khau teelin lawptakin na sem hi.

¹⁴Amah sumbawl tembaw tawh kibang a, gamlapi panin an a pua hi.

¹⁵Amah khuamial lai pi-in tho a, a innkuanpihte ading an bawlin a nasem numeite sep ding teng a hawmsak hi.

¹⁶Amah’n lo hoih zongin lei-a; ama thalawhsa-in lenggui a suan hi.

¹⁷Nasep hahkat mahmah a, a nasepna adingin a bante khauh hi.

¹⁸A sumbawlna met sa a, zanin a meivak a mit kei hi.

¹⁹A khutin mui tawi-a, a khutmete in muikung a len hi.

²⁰Mizawngte huai-in a tasamte a zam hi.

²¹A innkuanbup puansan guan zo ahi manin vuk a kiat hangin a innkuante ading a lunghimawh kei hi.

²²A lupna tuam ding bawl-a; saihadial puan hoih le puan dupsante a silh hi.

²³Khuapi kongpi a gamsung upate lakah a pasal a tut ciangin kizahtak hi.

²⁴Amah in saihadial puante khui-in zuaka, sumbukte tungah puan kawnggakte puak den hi.

²⁵Amah thahatin zahtakbaang a; mailam hun ding a nuihsan lel hi.

²⁶Amah pil kampau-a a muanhuai lamlahna a gen hi.

²⁷Amah in a innkuan sung vana, zawntatna an a ne kei hi.

²⁸A tate tho-in, ama tungah thupha ci uh a; a pasal in zong tuamah ci-in:

²⁹"Numei tampi in na thupite sem taleh tuate khempeuh na khup hi," ci-in a phat hi.

³⁰Ngaihbaanna in hong khem thei a, mel hoihna lah mual pah hi; TOPA kihta numei ahileh phat ding ahi hi.

³¹A thalawhsa pahtakman pia unla, ama sepsa hangin khuapi kongpi ah amah kipahtawi hen.