Read Zokam Paunakte 4 Bible Online

Paunakte 4 - Zokam bible

Paunakte 4

¹Ka tapate aw, pate lamlahna ngai unla, thusimin theihtelna ngah un.

²Sinna picing kong pia hi; kong hilhna nawlkhin kei un.

³Ka nu ta neihsunin ka pa inn ah naupang moi-a ka om lai-in

⁴amah in, "Na lungsim neih zahin ka thute lenkip inla, ka thupiakte zui lecin na nungta ding hi.

⁵Pilna ngahin theihtelna ngah in; ka thugente mangngilh kei inla, pialkhiatsan kei in.

⁶Pilna pialsan kei lecin ama’n hong dal dinga, amah it lecin ama’n nang hong cing ding hi.

⁷Pilna thupipen ahi manin pilna zong in. Na neih khempeuh b[8] na bei lawh zongin theihtelna zong in.

⁸Pilna thupisak in, nang hong tawisang ding hi; amah pom in, nang hong pahtawi ding hi.

⁹Na lutang ah kilawmna pakkhi hong khimsak dinga, a thupi kumpi lukhu hong khusak ding hi," hong ci hi.

¹⁰Ka tapa aw, ngai-in ka thugen sang in; na khan sawt ding hi.

¹¹Na pil nading lammaan ah kong pi a, lamtang kong zuisak hi.

¹²Na pai ciangin na kalsuanna hong dal om lo ding hi. na tai ciangin na kimuktu kei ding hi.

¹³Lamlahna lenkip inla khahsuah kei in; na nuntak nading ahi manin limtakin cing in.

¹⁴Migilote’ lampi tawn kei inla, mikheltatte’ lampi zui kei in.

¹⁵Tua lampi pel inla, tawn kei in; tua pan kiheikhia inla, nang lampi ah pai in.

¹⁶Migilote a sia khat a bawl mateng ihmu thei lo uh a, mi khatpeuh a puksak matengun a ihsip kei uh hi.

¹⁷Amaute in gitlohna annekin nei uh a, ngongtatna zudawnin a nei uh hi.

¹⁸Thumaan mite’ lampi ahileh ni suak tung nizang banga, sun nitang a bat dong a tangpha semsem hi.

¹⁹Ahi hangin migilote’ lampi khuamial thukpi banga; amau in a muktusak a thei kei uh hi.

²⁰Ka tapa aw, ka thugen thusim inla, ka kammalte limtakin ngai in.

²¹Mitkhah loin en gige inla na lung sungah kem in;

²²a mute adingin tuate nuntakna hi-a, mihing khat pumpi bup adingin damna ahi hi.

²³Lungtang in nuntakna nak ahi manin na khempeuh sangin lim kep zaw in.

²⁴Na kam panin thukawi paukhia kei inla; na muk panin kam hoih lo pau kei in.

²⁵Na mailam tangtakin en inla na mailam mah mitsuan gige in.

²⁶Na zuih lampi maihtam a[9] inla, a kipte bek tawn in.

²⁷Taklam le veilam ah pial kei inla, gitlohna lampi tawn kei in.