Read Zokam Paunakte 5 Bible Online

Paunakte 5 - Zokam bible

Paunakte 5

¹Ka tapa aw, ka pilna thusim inla, ka thu laigilte limtakin ngai in;

²tua hileh kidop na siam dinga, na muk in theihna a kem thei ding hi.

³Ahang in angkawmnu’ muk khuaizu-a diahsa banga, a kampau sathau sangin zolzaw hi;

⁴ahi zongin a tawpna ah tuanu, sinkha bangin kha-a, langnih a hiam namsau bangin hiam hi.

⁵Amah sihna lam manawhin paisuk a, tangtakin hankhuk b[10] a zuan hi.

⁶Nuntakna lampi ngaihsun lo-a; a lampi a kawi hangin a thei kei hi.

⁷Tua ahi ciangin ka tapate aw, tu-in ka thu ngai un; ka genna pan pial kei un.

⁸Tuanu gamlapi ah peel unla, a inn kongkhak kiang tawn kei un,

⁹tua hi kei leh na thahatpenna uh midangte na pia ding uh a, na hun om lai teng uh a kheltatpa na pia kha ding uh hi;

¹⁰tua hi kei leh gamdang mite in nang neihsa-in pawi bawl ding uh a, gimpi-a na sepsate in midang khat a hausak ding hi.

¹¹Na nuntakna nunung lam, na guhtui a kan ciangin na mau ding hi.

¹²"Bangci in sektatna mudahin, kibawl phat ding pampaih ka hiam!

¹³Ka siate thu ka mang kei-a, lam hong lakte thu ka ngai kei hi.

¹⁴Tu inlah mi kikhawm honpi bup lakah kisiatna dawn ka tungta hi," na ci ding hi.

¹⁵Nangma tuibeel pan le nangma tuiluang khuk panin dawn in.

¹⁶Kongzingte ah na tuinakte letkhia-in, na luituite tual-awng ah letkhia ding ahi hiam?

¹⁷Nang kia aa bek hi henla, mikhualte tawh neikhawm kei in.

¹⁸Na tuikhuk in thupha ngah henla, na moi lai-a na zi tawh nuamsa in.

¹⁹A ithuai sazukpi, a hehpih siam sazuk tal- a nawite in tai den inla a itna in na lung kuai den hen.

²⁰Ka tapa aw, bang hangin angkawmnu khat matcipsa-in om na hi hiam? Bang hangin midang khat zi’ angkawi ding na hi hiam?

²¹Ahang in, TOPA in mi khat nuntakna mu khin kiuhkeuh a, a lampite khempeuh a sittel hi.

²²Migilopa, ama gamtatna hoih lo ah awk a, a mawhna khaute in gakcip hi.

²³Amah in a kisek zawhlohnate sihlawh dinga, ama hailuatna in pimang ding hi.