Read Zokam Paunakte 6 Bible Online

Paunakte 6 - Zokam bible

Paunakte 6

¹Ka tapa aw, na vengpa tangin mawhlawh tawi dingin na om a, midang khat tangin kiciamna khut beng-a

²na kampausa ah awkin, na kampaute in hong mat leh

³tua ciangin ka tapa aw, na vengpa khut sung tungkhin na hi manin, na suahtak na’ngin: Pai-in nang mahmah kiniamkhiat in; na vengpa tungah thum tentan in.

⁴Lusu kei inla ihmu kha kei in.

⁵Sabengpa khut panin suakta sanang bang, thangsiahpa’ thang pana suakta vasa bangin, nang le nang kisuahtak in.

⁶Thadahpa aw, miksi kiangah pai-in a nuntakzia ngaihsunin pil in!

⁷Tua in makaipa, a cingpa ahikeh a ukpa nei lo hi;

⁸tua hi napi anlak hunin an kaikhawm a, khuakhal lai-in an a khol hi.

⁹Nang thadahpa aw, bang tanvei lum lai ding na hiam? Na lupna pan cik ciangin tho ding na hi hiam?

¹⁰Tomkha ihmut sung, tomkha mengmet sungin, tomkha khut zepa khawl sungin -

¹¹misuampa bangin zawnna hong tung dinga, galhiam tawipa a[11] bangin taksapna in hong pha ding hi.

¹²Misia, mi tatkhelpa zuauphuakin vak kawikawi a,

¹³a mit phoisakin a kheginin lak a, a khutmete tangsakin

¹⁴a lungsim ah khem a sawmsimpa - amah in kitotna piangsak den hi.

¹⁵Tua ahi manin siatna in bing phak dinga, a kibawlpha thei lo dingin thakhatin a kisia ding hi.

¹⁶TOPA in a muhdah na guk om a, kihuai a sak na sagih om hi,

¹⁷tuate in: Kihihsakna mit, a zuauthei leii, mawhpeng sisan a luangsak khut,

¹⁸gitloh a sawm lungtang, gitloh hih dinga kinawh khete,

¹⁹zuauthu gen-a teci pangte le sanggamte laka mi helhotpa ahi hi.

²⁰Ka tapa aw, na pa thupiakte zui inla, na nu hong hilhte nawlkhin kei in.

²¹Na lungtang ah khihden inla, na ngawng kimkot ah gakden in.

²²Na paina peuh ah hong pi-in, na ihmut ciangin hong vil dinga; na khanlawh ciangin hong hopih ding hi.

²³Hih thupiakte meivak hi-a, hih hilhna khuavak hi-in, kipuahphat nadinga kisekna in nuntakna lampi hi-in,

²⁴numei zuautatte panin nang hong kem dinga, uklah zi’ kamkhum panin nang hong kem ding hi.

²⁵Ama melhoihna iplah kei inla, hong zawlmitna khenglah kei in;

²⁶ahang in, numei kizuaknu in anlum khat zahin na man kiamsak dinga, angkawmnu in na nuntakna mahmah a sialnek ding hi.

²⁷Mi khat in a puan kangsak loin mei-am pom thei ding ahi hiam?

²⁸Mi khat in a khe kangdulhsak loin meiholsa tungah pai thei ding ahi hiam?

²⁹Midang khat zi a luppihpa tua tawh a kibang hi-a; tuanu a lawngkha peuhmah in dan tuak loin a om kei ding hi.

³⁰A puksi dektak gutapa in a gilpi puah nading a guk leh tua gutapa a kisimmawh kei hi.

³¹Tua hi napi amah a kimat leh a inn-a a neihsa teng a bei zongin a zah sagih in a loh pelmawh ding ahi hi.

³²Ahi hangin angkawmpa in thukhentelna a thei lo hi-a, tua banga gamta mi amah le amah kisusia ahi hi.

³³Ama lawhtak vuakna le minsiatna hi-a, a maizumna a veng ngei kei ding hi;

³⁴ahang in, hazatna in pisalsa khat hehna khangsak a, a phu a lak ciangin a lainat kei ding hi.

³⁵Amah in a tanga sum piak sang loin, golhsum tampitak a piak hangin a nolh ding hi.