Read Zokam Paunakte 7 Bible Online

Paunakte 7 - Zokam bible

Paunakte 7

¹Ka tapa aw, ka thute kem inla, ka thupiakte na sungah khol in.

²Ka thupiakte kem lecin na nungta ding hi; kong hilhte na mit nauta bangin cing in.

³Na khutmete ah vial in; na lungtang pek tungah gelh in.

⁴Pilna kiangah, "Ka sanggamnu na hi hi," ci inla, theihtelna na tanau-in man in;

⁵amaute in angkawmnu panin nang hong kem ding uh a, uklah zi kamzol panin hong kem ding uh hi.

⁶Ka inn tawhlet a vathangheng vangah ka khuadak hi;

⁷mimawlte lak, tangvalnote lakah thukhenteltheihna a nei lo khangno khat ka mu hi.

⁸Amah tuanu innkiu lampi ah paisuk a, tuanu inn lam manawhin a pai hi;

⁹tua hunin ni tumta a, khua mui-in khua mialta hi.

¹⁰Tua ciangin a kizuak numei bangin a kizem numei khat ngim siamna khat neisa-in amah dawn dingin a kuankhia hi.

¹¹(Tuanu suahngalin thumang lo-a, inn ah a om hithiat ngei kei hi;

¹²kongzing lak, tual awngte le mun kiu teng ah mi a buk hi.)

¹³Tuanu in amah mancipin tawpa, maingaltakin:

¹⁴"Ka innah kilawmtakna biakna a[12] ka bawl a; tuni-in ka thuciam ka tangtun hi.

¹⁵Tu-in nang muak dingin kong pusuak hi; kong zon leh kong mu ta hi!

¹⁶Ka lupna Egypt pana puangial hoihin ka tuam khin hi.

¹⁷Ka lupna, myrrh, aloes le cinnamon gimnamtuite in ka namsak khin hi.

¹⁸Hong pai in, zingsang dong itna tui dawnkhawm ni; eigel kia in itna nuamzat ni!

¹⁹Ka pasal inn ah om lo hi; khual gamlapi-a zin ahi hi.

²⁰A sum-ip dimin sum pua-a, khaliik mateng inn ah hong ciah lo ding hi," a ci hi.

²¹Zolna kam in amah lampialsak a, ama kamnel in a khem zo hi.

²²Amah a kigawh nading mun zuan bawngtal bang, thaltang in a sin a sutlet dong a awk nading khaukual b[13] zuan sazuk c[14] bang

²³vasa in thang a bawh bangin bawh a, a nuntakna bei nading ahilam a thei kei hi.

²⁴Tua hi-a ka tapate aw, tu in na ngai un; ka thugen thupisim un.

²⁵Tua numei lam ngaihsun kei unla, a lampi pialsan un.

²⁶Tuanu in mi tampitak liamsuah a, a thahte mi thahat ngentang ahi hi.

²⁷Ama inn han d[15] lam zuatna lam lianpi hi-a, sihna inndei sung tunna ahi hi.