Read Zokam Paunakte 8 Bible Online

Paunakte 8 - Zokam bible

Paunakte 8

¹Pilna in hong sam hi lo hiam? Theihtelna in a aw sangsak hi lo hiam?

²Lampi dunga asanna mun teng, lamkabom tengah panmun la-in;

³khuapi sung zuatna kongpite gei, a sung lutna ah tuanu nakpi-in kiko a:

⁴"No mihingte aw, kong sam hi; minam khempeuh tungah ka aw ka sangsak hi.

⁵No mimawlte aw, kidop siamna ngah un, no mihaite aw, theihtelna ngah un.

⁶Ngai un, a manpha nate kong gen hi; thumaan gen dingin ka kamka hi.

⁷Ka muk in gitlohna kih ahi manin ka kam in thumaan gen hi.

⁸Ka kammal khempeuh thutang hi-a, thukawi le thu kitukalh khat beek a om kei hi.

⁹A theisiamte adingin thumaan vive hi a, theihna neite adingin khialhna a om kei hi.

¹⁰Kong lamlahna ngun tangin teel unla, kham tangin theihna teel un,

¹¹ahang in, ruby sangin pilna manphazaw a, na deih theih na khat beek tehpih ding om lo hi.

¹²"Keimah pilna in, kidop siamna tawh ka tengkhawm a, theihna le theihkaknate ka nei hi.

¹³TOPA kihtakna in gitlohna muhdahna hi-a: kei in kisaktheihna, ki-uatsakna, gitloh-gamtatna le kampau-kawi ka mudah hi.

¹⁴Thu kikuppih le amaana thukhenna kei aa hi-a; theihtelna le vangliatna kei aa ahi hi.

¹⁵Kei tungtawnin kumpite in uk uh a, gam-ukte in thutangin ngeina a bawl uh hi.

¹⁶Kumpi tapate le leitunga e[16] upna nei ulian khempeuh in kei tungtawnin uk uh hi.

¹⁷Kei hong itte ka it a, kei hong zongte in hong mu uh hi.

¹⁸Hauhna le pahtawina, hauhna kip le daupaina kei aa ahi hi.

¹⁹Kham siangsa sangin kei gah hoihzaw a, ngun hoih pen sangin kei gahsuah hoihzaw hi.

²⁰Thutang lampi zui-in thumaanna lampi ka tawna,

²¹kei hong itte hausakin amaute goukholna ka dimsak hi.

²²TOPA in tanglai-a a nasepte f[17] a sep ma, a nasepte sung panin kei g[18] hong piangkhiasak masa hi.

²³Leitung a om ma, atung pek pan, a tawntungin kei a sehsa h[19] ka hi hi.

²⁴Tuipi a om ma, tuinakte pan tui a luan ma-in kei ka suak khin hi;

²⁵mualneute le mualliante a mun dingah a kikoih ma,

²⁶leitung le a tunga lote, leitang vuite khatpeuh a bawl ma-in kei hong kisuaksak zo hi.

²⁷Vantungte a mun ah a koih lai tuithuk tunga muhtawp a ciamteh lai,

²⁸tunglam ah meiite koiha, tuithuk nakte a kipsak lai,

²⁹tuite in ama thupiakna val a kal loh nadingin tuipi gamgi a khun lai le leitung bulpi ding a ciamteh lai-in, tua lai-ah kei ka om khin hi.

³⁰Tua hun lai-in a gei-ah khutsiampa in ka om hi. Nisimin nuam ka sa mahmah a, ama ompihna ah kipak tawntungin,

³¹ama leitung buppi ah kipakin mihingte lak nuam ka sa hi.

³²"Tua hi-a ka tapate aw, ka thu ngai un; ka lampi a zuite thupha ngah ahi hi.

³³Kong lamlahna ngai inla pil in; thusim lo kei in.

³⁴Ka thu ngai-a ka kongkhakte nisimin vila, ka kongvang ah a ngak mi thupha ngah ahi hi.

³⁵Ahang in kei hong zong peuhmah in nuntakna mu hi-a, TOPA angvanna a ngah hi.

³⁶Kei hong zong lo mi ahileh amah le amah kinasak hi-a, kei hong mudah khempeuh sihna it ahi hi.