Read Zokam Paunakte 9 Bible Online

Paunakte 9 - Zokam bible

Paunakte 9

¹Pilna in khuampi sagihte sui khin a; a inn lam khin hi;

²Amah in sasem khinin, zu leih khin a; a sabuai zong phah khin hi.

³A innteng numeite sawlkhia khin a, khuapi sung bosangpenna mun tengah a kikosak hi.

⁴"Thu khentel thei lote kiangah, "Mimawl khempeuh hih lai-ah hong paisak un!"

⁵"Hong pai-in ka an ne unla, ka leihsa zu dawn un.

⁶Na haina nusia lecin na nungta ding hi; theihtelna lampi tawn in.

⁷"Mi simmawhte a puahpha peuhmah engkona sam hi-a; migilote a tai peuhmah engkona kitut ahi hi.

⁸Mi simmawh khat tai kei in, hong mudah ding hi; mipil khat tai lecin hong it ding hi.

⁹Mipil khat lamlak lecin pil semsem dinga; thumaan mi khat hilh lecin a theihna behlap ding hi.

¹⁰"TOPA kihtakna in pilna kipatna hi-a, Siangtho Pa theihna in theihtelna ahi hi.

¹¹Ahang in, kei tungtawnin na khan sawt dinga, na nuntak kum kibehlap ding hi.

¹²Na pil leh pilna pahtakman na sang dinga; mi na simmawh leh nang guak in na thuak ding hi," ci hi.

¹³Numei Hai nak pau-a; amah kisek thei loin theihna nei lo ahi hi.

¹⁴A inn kongkhak ah tu-in, khuapi bosangpen tutphah ah tu-a,

¹⁵amau santek-a pai tua lai tawnte a sam hi.

¹⁶Thu a khentel thei lo mite kiangah, "Mimawl khempeuh hih lai-ah hong pai un!"

¹⁷"Guksim tui khum a, an neksim lim diak hi!" ci hi.

¹⁸Ahi hangin amaute in tua lai-ah misite om a, ama lenglate hanthukpi a[20] sungah om ahilam a thei kei uh hi.