Read Zokam Thuhilhna 10 Bible Online

Thuhilhna 10 - Zokam bible

Thuhilhna 10

¹Tho sisa in paknamtui a namsiatsak bangin, haina neuno khat in pilna le pahtawina leek zo hi.

²Mipil’ lungsim taklam ah awn-a, ahi hangin mihai lungsim veilam ah awn hi.

³Mihaite in ngaihsut nei loin a lampai kawm nangawnun amau haitatna miteng a lak uh hi.

⁴Gam-uk khat nang tungah a heh leh na dinmun nusia kei in; daih khikhena in khialhna lianpi daisak thei hi.

⁵Sunni nuai-ah gitlohna khat ka mu-a, gam-ukte pana ngaihsut khialhnate pawl ahi hi.

⁶Mihaite dinmun sang tampi-ah kikoih a, mihaute in dinmunniam a ngah uh hi.

⁷Silate sakol tungah tuang uh a, gam-ukte sila bangin a khe-un a pai uh ka mu hi.

⁸Gum tote, gum sungah kia thei a; kulh tovangte gul in tu thei hi.

⁹Suangtum tote tuate mah in liam thei uh a; singtum ekte tuate mah in liamsuah thei hi.

¹⁰Hei kungh a, kitat hiam kei leh thatang san ding kisam a, ahi hangin siamna in hong zosak ding hi.

¹¹Gul in a kikhim ma-in hong tuk leh a khimpa adingin metna om lo hi.

¹²Mipilpa thugen zaknophuai a, ahi hangin mihaipa ama kam in valhtum hi.

¹³A kam patna haihuai a; a kamtawpna gitlohna suakin -

¹⁴mihaipa in kam tampi pauthuah hi. Kuamah in hong tung ding theikhol lo a - ama nunga piang ding kua in genthei ahi hiam?

¹⁵Mihai nasep in amah gimsak a; khuapi zuatna lampi a thei kei hi.

¹⁶Nasem a[14] khat kumpi-in nei a, zingsanga pawi bawl gam-uk a nei gam aw, gimna na thuak ding hi.

¹⁷Nampite kumpi in nei a, ahun manin ne a - kham nading hi loin hat nadingin a ne uliante a nei gam aw, thupha ngah na hi hi.

¹⁸Mi khat a thadah leh a innsun kuai a, a khut a zawt leh a inn keh hi.

¹⁹Nuih nadingin pawi kibawl hi-a, zu in nuntak nuamsakin, ahi hangin na khempeuh suma kilei ahi hi.

²⁰Na lungsim nangawn ah kumpipa phuisam kei in, ahikeh na lupna inndei ah mihaupa hamsiat kei in, bang hang hiam cih leh huihlak vasa khat in na thugen puak thei dinga, vasa leng khat in na thugen va ko thei ding hi.