Read Zokam Thuhilhna 11 Bible Online

Thuhilhna 11 - Zokam bible

Thuhilhna 11

¹Tuite tungah na anlum lawn lecin ni tampi khit ciangin na mu kik na ding hi.

²Leitungah bang siatna piang ding cih thei lo na hi manin khen sagih khen giat dong suahin mi tungah pia in.

³Meiite ah tui dim leh, leitungah guah buasuk hi. Singkung khat leilulam ahikeh leitawlam a puk nading munah puk a, a pukna munah lumcip pah hi.

⁴Huih nunzia a cing peuhmah in suan lo dinga; meiikaizia a cing peuhmah in a at kei ding hi.

⁵Huih paina lampi le a nu sungah pumpi bangci kibawl a[15] cih na theih loh bangin na khempeuh Bawlpa Pasian nasepna na theitel kei ding hi.

⁶Na Khaici zingsangin vawh in, nitak in zong vawh inla na khutte zawsak in, ahang in hih pen maw, hua pen maw, a nih-in hoih tuak ding maw, cih na thei kei hi.

⁷Khuavak nuam a, mit in ni a muh ciangin nuamsak hi.

⁸Mihing khat a nuntak sung kum tampi ahi zongin tuate khempeuh nuamtakin zang ta hen. Ahi hangin amah in khuamial ni ding thei ta hen, ahang in, tuate tampi pha ding hi. Hong tung ding na peuhmah a mawknapi ahi hi.

⁹Khangmoipa aw, na moi lai-in lungnuam inla, na khangno hun sungin na lungsim nopsak bangin om in. Na lungsim hong pina le na mita na muh bang zui in; ahi hangin Pasian in na khempeuh ah thu hong khen ding ahilam thei in.

¹⁰Tua ahitak ciangin na lunghimawhna beisak inla, na pumpi adingin na lungkhamna paikhia in; ahang in, khangmoina le kithatang-muanna a mawknapi ahi hi.