Read Zokam Thuhilhna 2 Bible Online

Thuhilhna 2 - Zokam bible

Thuhilhna 2

¹Ka lungsim sungah, "Hong pai dih in a hoih na muh khiat nadingin nopsakna tawh nang kong zia-et ding hi," ci-in ka ngaihsun hi. Ahi hangin tua zong a mawknapi mah ahi hi.

²"Nuihna in haina ahi hi. Tua hileh nopsakna a khiatna bang ahi hiam?" ka ci hi.

³Zu-a gualnopna le haina kawicip kawmin - ka lungsim pilna tawh a makaih dingin kei mahmah ka hanciam hi. Van kikhupsin nuai-ah mihingte tomvei a nuntak sungin bang sem leh manpha ding hiam, cih ka thei nuam hi.

⁴Nasep lianpi ka sem hi: Kei ading innte lamin lengguite ka suan hi.

⁵Huan le khawlmun nuamte ka bawl a, tuate sungah singgah kung namcin ka suan hi.

⁶Tua singhalhte tui buah nadingin bualtuite ka bawl hi.

⁷Sila numei le sila pasal ka lei-a, ka inn sunga suak adang sila zong ka nei hi. Kei ma-a Jerusalem a om khatpeuh sangin tuuhon le bawng hon tam ka nei zaw hi.

⁸Kei mahmah in kumpite le gamte neihsa gou ngun le kham tampitak ka khol hi. Pasal lungsim nopna dingin mihing a lung nuamsak ding - lasa numei, lasa pasal le pasal lungsim nopna dingin zi tampi koihna a[2] zong ka nei hi.

⁹Kei ma-a Jerusalem a omsate sangin nakpi in ka lianzaw tham hi. Hihte khempeuh ah ka pil ngei-in ka pil hi.

¹⁰Ka mit iplah khempeuh panin ka kidaam kei hi; ka lungsim nopsakna ka nial kei hi. Ka nasep khempeuh ah nuam ka sa a, hih in ka gimna khempeuh hanga ka pahtakman ahi hi.

¹¹Tua hi napi ka khuta ka sepsa khempeuh ka et phat kik ciangin haksapi a ka sepnate khempeuh a mawknapi, huih nungdelh lel ahi hi; sunni nuai-ah hamphatna bangmah a om kei hi.

¹²Tua ciangin pilna, haina le haitatna ka ngaihsun leuleu hi. Kumpite zalaihte in a ma-a semte sepsa zah val bang sem thei ahi hiam?

¹³Khuamial sangin khuavak a hoihzawk bang tektekin haitatna sangin pilna a hoih zawk lam ka mu hi.

¹⁴Mihaipa in khuamial sunga a pai laitakin mipilpa in a lutangah mit nei a, ahi hangin a nih un a kibanga a tuah ding uh ka thei hi.

¹⁵Tuateh ka lungsim ka ngaihsun a, "Mihaite tuah mah kei zong ka tuak ding hi. Tua ciangin ka pil manin bang lawhtak ding ka hi hiam?" ka ci hi. Ka lungsim sungah, "Hih zong a mawknapi hi ei!" ka ci hi.

¹⁶Ahang in, mihaite mah bangin mipilte sawt a kiphawk tuan kei ding hi; mailam hunah a nihun kimangngilh ding hi. Mihaite mah bangin mipilte zong a si pelmawh ding uh hi.

¹⁷Tua hi-a sunni nuai-ah gimpi-a nasep in hong khasiasak lel ahi manin nuntakna ka mudah hi. Tuate khempeuh a mawknapi hi a, huih nungdelh lel ahi hi.

¹⁸Kei nunga piang dingte adingin ka nusiat pelmawh ding ahi manin sunni nuai-a haksapi-a sepsa na khempeuh ka mudah hi.

¹⁹Tua hi-a, kua in amah a pil ahikeh a hai ahih ding lam thei ahi hiam? Tua hi napi sunni nuai-a hanciamna le siamna tawh ka sep khempeuh tungah amah in uk ding hi. Hih zong a mawknapi mah ahi hi.

²⁰Tua ahi ciangin sunni nuai-ah haksapi a ka nasepte khempeuh hangin ka lungkiat ding kipan hi.

²¹Ahang in, mi khat in a pilna a siamna le a theihna tawh na sem dinga, a sem lo mipa adingin ama neihsa khempeuh a nusiat ding hi. Hih zong a mawknapi mah hi-a, vangsiatna lianpi khat ahi hi.

²²Mihing in haksapi in sunni nuai-ah thatang sanin na a sep man bang ngah ahi hiam?

²³A nuntak sunga ama nasep, natna le dahna ahi hi; zan nangawnin a lungsim a tawlnga kei hi. Hih zong a mawknapi mah ahi hi.

²⁴Mi khatin, ne-in dawnin na a sepna ah a lungkimna zah val a hoihzaw bangmah a sem thei kei hi. Hih zong Pasian khutsuak hi, cih ka mu hi;

²⁵ahang in, amah loin kua in an ne-in nuamsa thei ahi hiam?

²⁶Pasian in amah a lung kimsakpa tungah pilna, theihna le lungnopna pia-a, mawhneipa ahileh Pasian a lungkimsakpa tungah a ap ding hauhnate kaikhawmsakin a kholsak hi. Hih zong a mawknapi mah hi-a, huih nungdelh lel mah ahi hi.