Read Zokam Thuhilhna 3 Bible Online

Thuhilhna 3 - Zokam bible

Thuhilhna 3

¹Na khempeuh in hun nei ciat hi, van kikhupsin nuai-a piang khempeuh amau hunhun-a piang hi-a:

²suah hun omin sih hun om a, suan hun omin bawhkhiat hun om a,

³thah hun omin damsak hun om a, phelkhiat hun omin lam hun om a,

⁴kah hun omin nuih hun om a, thum hun omin lam hun om a,

⁵suangte thehthang hun omin tuate khop kik hun om a, kikawi hun omin kikhah hun om a,

⁶zon hun omin mansak hun om a, kep hun omin paihmang hun om a,

⁷balkek hun omin phop hun om a, daih hun omin pau hun om a,

⁸it hun omin muhdah hun om a, kido hun omin kilem hun om hi.

⁹Na sempa in gimpi-a na a sepna panin bang lawhtak ahi hiam?

¹⁰Pasian in mihing tungah a suat vangik ka mu ta hi.

¹¹Amah in na khempeuh amau hun ciat-a a melhoih dingin a bawl ahi hi. Amah in mihingte lungsim a tawntunga ding zong guan napi amaute in Pasian nasepsa a kipatna pan a mong dong a lamteh thei tuan kei uh hi.

¹²Mihingte adingin a nuntak sungun na hoih sema a lungdam ding uh sanga hoihzaw bangmah ka thei kei hi.

¹³Mihing peuhmah in ne thei dawn thei-a a nasepna khempeuh ah a kham a ngahna - hih in Pasian letsong ahi hi.

¹⁴Pasian sepsa khempeuh a kip tawntung ding ahilam ka thei a; bangmah kibehlap thei loin bangmah a kilakhia thei kei hi. Mihing in amah a zahtak theih nadingin Pasian in tuaci-in a bawl ahi hi.

¹⁵A omte a om ngei khinsa hi-a, a om lai dingte zong a om ngeisa mah hi-in, Pasian in a om khinsa mah mangkik a[3] ding hi.

¹⁶Tuateh sunni nuai-ah nadang ka mu lai hi: Thukhenna munah - gitlohna om a, thutang omna munah - gitlohna a om hi.

¹⁷Ka lungsim sungah, "Pasian in thumaante le migilote tungah thu a khen tuak ding hi, ahang in sepna ding hun omin bawl nading hun om ding hi," ci-in ka ngaihsun hi.

¹⁸Kei zong, "Mihing in, amaute ganhing tawh kibang ahilam a muh theih nadingun Pasian in amaute sittel hi.

¹⁹Mihingte tuah le ganhingte tuah a kibang hi-in, a nih un a kibang tuah ding ngak uh a: Khat a sih bangin a khat zong a si hi. A vekpi in huu sang b[4] ciat uh a; ganhing sangin mihing a tungnun zawkna a om kei hi. Na peuhmah a mawknapi ahi hi.

²⁰A vekpi-in a mun kibangah pai uh hi; a vekin leivui pan pianga, tuateh leivui mah ah ciah kik hi.

²¹Mihingte kha a kahtoh lam le ganhingte c[5] kha lei sungah a tuahsuk lam kua in thei ahi hiam?" ci-in ka ngaihsun hi.

²²Tua ahi ciangin mi khat in ama nasep nuam a sak ding sanga hoih zaw bangmah ka mu kei hi; bang hang hiam cih leh tua in ama tanh ahi hi. Ahang in, ama nungah bang piang ding cih a en dingin amah kua in theisak thei ding ahi hiam?